Taga Lakas mitapon sa LP

CEBU, Philippines - Ang hinugpong nga pagpanapon sa mga kaalyado sa partido administrasyon ngadto sa Liberal Party (LP) maoy tataw kaayong kamatuoran nga gipul-an na sila sa administrasyong Arroyo, sumala ni LP President Mar Roxas kagahapon.

Si Roxas kinsa maoy gitakdang bise presidente nga kandidato sa LP karong umaabot nga election nagkanayon nga nasuta nila karon nga gusto na gyud ang tawo og kausaban ug usa ka bag-ong Pilipinas.

Matud ni Roxas nga ang nakaayo sa LP mao ang kalig-on ug baruganan niini nga gitukod sa usa ka bantilis nga bato nga dili gayud maluka bisa’g mag-unsa uban sa plataporma  nga walay kausaban ug pabor kanunay sa maayo ug tukma nga pangagamhanan.

Samtang si Senador Benigno “Noynoy” Aquino III kinsa maoy mahimong standard bearer sa LP sa election sa Mayo 2010 nakamatngon usab nga ang gisaad sa LP nga bag-ohon ug usbon ang dagan sa pangagamhanan sa nasud ngadto sa kauswagan niini nakahatag og dugang paglaum sa mga Pilipino.

Matud pa niya nga makita kaayo sa dagway sa daghang mga Pilipino karon ilabi na sa mga kabus nga wala nay laing gituohan ug gilauman kundi ang saad sa LP nga bangunon pagbalik ang nasud gikan sa pagkalukapa niini ,aron mabuhi ang mga Pilipino nga haruhay sa panginabuhi, malinawon ug dili mag-ilaid sa hilabihang kalisod.

Ang mga dagkong kaalyado sa administrasyon nga dili pa dugay mitapon sa LP mao sila si Mayor Hernani Braganza, sa Alaminos, Kongresista Victor Agbayani sa Pangasinan, ug Kongresista Bernardo Piñol, Jr. sa Cotabato.

Nasayran usab nga mikabat sa 125 ka mga opisyal sa local nga kagamhanan gikan sa nagkalainlaing bahin sa nasud nga kanhi mga sakop sa Lakas anaa na karon sa LP. (Lesley Caminade)   (BANATNEWS)