Tigbakayan gironda 2 ka tawo nangaangol

CEBU, Philippines - Nabalian sa iyang walang paa ang usa ka gidudahang usa sa mga nanugal sa tigbakayan dihang gipanggukod sa mga polis apan kini miambak sa 15 metros nga gitas-ong kural sa luyong bahin sa Carreta Cemetery diha sitio Cahipa, barangay Hipodromo kagahapon.

Gidali pagdala sa Cebu City Medical Center (CCMC) sa mga sakop sa Emergency Rescue Foundation (ERUF) ang biktimang si Ernesto Villamor, 50, taga barangay Mabolo human mabali ang walang paa tungod sa kusog pagkatagak gikan sa kural. Samtang nasamdan sa walang tiil ang usa ka Alexander Coraratan sa mao gihapong hitabo. Una niini gikatahong nangreklamo ngadto sa kapulisan ang mga concerned citizen human pwerteng sabaa sa mga sugarol pagmasyada sa ilang pagpahigayon og tigbakay sa luyong bahin sa sam-ang.

Hinungdan nga daling gironda ang maong tigbakayan nila ni Chief Insp. George Ylanan, sa Investigation and Detection Management Branch (IDMB) ug mga sakop sa Waterfront Police Station, Mobile Patrol Group (MPG). Dihang nakapanimaho sa kapulisan ang mga sugarol nagkatibuagsa sila sa pagpanagan bitbit ang ilang mga manok samtang ang uban nanglayat sa kural apan way swerte ang biktimang si Villamor tungod kay sa iyang pagtugpa sa ubos didto kini motugpa sa kanal ugmaayong pagkabali sa iyang walang paa. Ang maong tigbakayan gikatahong walay permit gikan sa barangay hinungdan nga gironda sa kapulisan ug gipangguba ang gipanghimong ruwedahan sa ingon dili na kini magamit pa pagbalik.

Human sa maong pagpang-ronda gisakmit sa kapulisan ang usa ka manok nga patay na ug laing usa ka hiniktang buhi.

Nasayran nga gipahibalo nang daan ni Sr. Supt. Patrocinio Comendador nga dakpon gyud nila kadtong mga tawong mopasiugda og illegal nga sugal sama sa tigbakayan panahon sa kalag-kalag tungod kay sagad kining sinugdanan sa kagubot. – BANAT NEWS