Working hours sa mga call centers ipausab

CEBU, Philippines - Giawhag karon ni Cebu City Councilor Edgardo Labella ang mga call center sa siyudad nga mahimong dugukan sa kausaban sa kultura sa maong matang sa trabaho.

Kini pinaagi usab sa pagmugna og Occupational Safety and Health (OSH) program nga magtubag sa physical ug psychological nga kaayuhan diha sa trabahoan.

Ang OSH program gimando na sa Department of Labor and Employment (DOLE) ngadto sa mga call center paghatag og medical ug social services ngadto sa mga trabahante.

Apan gisugyot ni Labella nga usbon usab ang working time sa mga call center aron mahatagan og kahigayunan ang nadestino sa graveyard shift nga makadalikyat pagkatulog.

Kini sama sa alas 4:00 sa hapon ngadto na sa alas 12:00 sa tungang gabii, aron ang trabahante mahimo pa nga makatulog sa ala 1:00 sa kaadlawon hangtud na sa kabuntagon.

Sa samang higayon, kadtong ma-assign sa ala 1:00 sa kaadlawon hangtud na sa alas 8:00 sa buntag, mahimo usab nga makatulog gikan sa alas 5:00 sa hapon hangtud na sa alas 12:00 sa tungang gabii sa dili pa ang ilang duty.

Ang konsehal nabalaka sa report nga gipagawas sa World Health Organization (WHO) nga ang nanarbaho sa gabii ngadto na sa kabuntagon nga naglakip sa mga call center, dali rang mataptan og sakit tungod kay sagad niini giingong nagkuwang sa katulog.

Usa ka resolusyon ang ipalabang unya ni Labella sa City Council nga mag-awhag sa Human Resource Personnel sa mga call center sa dakbayan nga mahimong instrumento pag-usab sa kultura sa ilang matang sa trabaho.

Sa samang higayon awhagon usab sa konsehal ang mga research organization nga tun-an ang profile niadtong nagtrabaho sa mga call center.

Partikular na niini niadtong nakatrabaho na og pipila ka mga tuig sa maong matang sa trabaho kung wala bay namatikdan nga balatian sa ilang panglawas.

Kini sama sa insomnia, high blood pressure, irregular heart rhythms ug uban pa nga magamit sa hingtungdang ahensya pagsulbad sa maong problema. (Elly Bolonos)   (BANAT NEWS)