Gipalusot nga sakyanan gisakmit

CEBU, Philippines - Gikumpiskar sa mga sakop sa Customs Police ang usa ka sakyanan nga wala maapil sa deklarasyon sulod sa usa ka 20-footer container van nga miabot sa Cebu International Port gikan sa Estados Unidos niadtong petsa 17 sa milabay’ng bulan.

Matud pa ni Capt. Jerry Arizabal ang District Commander sa Enforcement and Security Services ESS Customs Police District sa Cebu Customs District Office human sa actual inspection ni special agent Andie Catre ug sa examiner nga si Rabel Abella nasutang adunay wala madeklarar nga sakyanan sud sa maong van hinungdan ila kining gikumpiskar.

Matud pa ni Capt. Arizabal nga ang tag-iya sa maong shipment mao ang Lantro Phils. Inc. nga nahimutang sa Legaspi Extention sa dakbayan sa Sugbu ug nagdeklarar nga duha ka used hydraulic shovel, usa ka used road roller, lima ka road generator; 35 ka used winch ug 18 ka cleaners ra maoy sulod niini.

 Apan dihang ilang gisusi ang sulod sa maong van dunay usa ka unit nga all- terrain vehicle nga nagkantidad og kapin sa P300 mil nga wala maapil sa deklarasyon sa manifesto.

Gikatahong kalapasan kini sa lagda sa Sec. 2503 sa Tariff and Customs Code of the Philippines ug sa Customs Memorandum Order # ESS-04-2009 human kini buot untang ipalusot sa consignee.

Tungod niini girekomendar ni Arizabal kang Cebu Customs District Collector Recardo Belmonte pagluwat og Warrant and Seizure and Detention pabor sa gobiyerno ang maong sakyanan. - Bong Soriano (BANAT NEWS)