Abogado nalambigit sa tulis

CEBU, Philippines - Ang kapulisan sa dakbayan sa Sugbu adunay igong ebidensiya batok kang Atty. Louie Arma nga matud pa kauban gyud nila ni Roy Quimada sa planong pagtulis ni Jennifer dela Cerna, usa ka jewelry dealer kinsa nakuhaan sa P6.2 milyones nga alahas apan nabawi sa kapulisan human dakpa ang mga tulisan.

Ang hepe sa kapulisan sa dakbayan sa Sugbu Sr. Supt. Patrocinio Comendador, mibutyag sa mga sakop sa media nga lig-on ang mga ebidensiya nga ilang nahuptan batok kang Atty. Arma.

Matud pa ni Comendador nga bisan pa kun dili makabarog ang extrajudicial confession sa usa sa mga tulisan nga si Frederick Ybañez, mosaler gihapon ang ilang EBIDENSIYA batok kang Atty. Arma.

Giklaro niya nga gawas sa statement ni Ybañez, nga nag-link kang Jennifer Enriguez nga maoy nagsugo sa maong pagtulis, aduna silay ubang testigos batok kang Atty. Arma, Enriquez, ug Quimada nga may labot sa plano.

Dugang pa ni Comendador nga nakuha usab nila sa cell phone ni Ybañez nga nagpamatuod nga si Enriquez mitawag usab sa maong akusado, ug lakip nga nanawag sa cell phone ni Ybañez mao si Atty. Arma.

Gibutyag usab ni Comendador, nga base sa ilang nakuhang impormasyon dili lang usa ka tulis nga naglambigit sa ngalan ni Atty. Arma.

Hinuon giklaro niya nga adunay katungod si Atty. Arma nga mopasaka og kaso batok sa kapulisan samtang sila usab dunay katungod sa pag-counter charge batok niini.

Nasayran nga niadtong milabay’ng gabii gibasura sa korte ang writ of habeas corpus nga gisang-at ni Enriquez batok sa kapulisan sa pagsikop niini ug paglambigit sa kaso.

Gipasaka na hinuon sa kapulisan ang kasong robbery batok kanila ni Frederick Ybañez, Noel Davis, Jeromy Polistico, Kirby Abanila, Jennifer Enriquez, Jose Roy Quimada, ug Atty. Arma. – BANAT NEWS