Magtiayon gipamusil, bana tipi, ginang angol

CEBU, Philippines -  Namatay ang usa ka drayber sa jeepney samtang nangaangol usab ang asawa niining natulog uban sa 5-anyos nilang anak nga lalaki sulod sa ilang balay sa sitio Angasil sa barangay Mactan, dakbayan sa Mandaue alas 9 pasado sa miaging Sabado sa gabii.

Ang namatay mao si Jeonrey Corbo Andrin, 29, samtang naangol usab si Vivian nga iyang asawa pulos nagpuyo sa maong dapit samtang padayon pang giila sa kapolisan ang mamumuno.

Si SPO1 Frederick Islet sa homicide section sa kapolisan sa maong dakbayan nga nahinabi sa Banat News miingon nga kasamtangang natulog ang mga biktima dihang misaka sa ilang balay ang wala mailhing mamumuno ug kalit silang gipamusil.

Nakabaton og samad pinusilan sa agtang ang bana nga milapos sa luyong bahin sa ulo samtang napusilan sa iyang buko-buko ang asawa niini.

Si SPO1 Islet miingon nga ang wala pa hiilhing mamumuno ang dali kaayong nakasibat pahilayo sa maong dapit ug ang mga silingan maoy mitabang sa magtiayon pagdala kanila sa Mactan Doctor’s Hospital apan ang bana nga nalungag ang ulo gideklarar nga patay na.  - BANAT NEWS