Polis gilaslasan P12,000 wagtang

CEBU, Philippines – Nagtibi ang usa ka polis gikan sa Negros dihang gilaslasan ang bulsa niini ug nahabwa sa kiriwan ang iyang P12 mil diha sa dalan Colon , barangay Kalubihan ning dakbayan kagahapon sa kaadlawon.

Si SPO3 Mateo Sanchez sakop sa San Carlos City Police sa Negros Occidental nagpahuyhoy sa abaga nga midangop sa Carbon Police Station ug gisumbong ang nahitabo kaniya.

Si PO3 Roger Caballes sa Carbon Police Station mibutyag sa Banat News nga usa ka ginganlan lang og “Langaw” maoy ilang gipasanginlang milaslas sa tuong bulsa sa polis.

Matud pa ni PO3 Caballes nga kagahapon sa kaadlawon maabot si SPO3 Sanchez sa nahisgutang dapit unya gisugat dayon kini og mga lalaki nga nakig-estorya kaniya, apan wala niya mabantayi nga gilaslasan na diay ang iyang bulsa ug nakuha ang iyang kwarta.

Gipangita sa kapolisan sa Carbon si Langaw apan wala na kini igkita sa pagsuwat ning balita.

Ang mga nakasaksi nagkanayon nga nangita kuno og babaye ang biktima nga ika-uban niini sa usa sa iyang lodging house apan wala siya makabantay nga bugaw diay nga maldito sa Colon ang iyang nasugatan.

Gituohan sa kapolisan sa Carbon nga ka-kunsabo ra usab sa babayeng iya untang ika-uban ang milaslas sa iyang bulsa. – BANAT NEWS