Ginang natagak sa trak

CEBU, Philippines - Ang manindahay og utanon giila nga si Estrella Minoza, taga Camansilles, siyudad sa Toledo.

Samtang ang drayber sa trak nga si Glen Sumbal, taga lungsod sa Balamban, kasamtangan karong gitanggong sa City Traffic Operations and Management (CITOM).

Matud pa ni Sumbal sa dihang nahinabi sa Banat News nga mao na lang ang iyang namatikdan nga gituktok na ang atop sa trak ug dunay misinggit nga pasahero hinungdan nga iya kining gipahunong.

Dugang pa niini nga mao na lang ang iyang nasayran nga natagak na diay ang usa sa iyang pasahero. Gibutyag ni Sumbal nga iyang permaninting pasahero si Miñoza. Sumala pa niini nga ang maong panghitabo aksidente lang ug wala siya'y kalibutan nga mao na diay kini nahitabo sa iyang pasahero.

Sa imbestigasyon sa   CITOM nasayran nga   ang trak nga gisakyan sa biktima gikan pa sa lungsod sa Balamban ug aduna kini karga nga mga utanon nga maoy negosyo sa mga pasahero niini.

Si Miñoza kalit lang nga natagak gikan sa trak tungod kay matud pa sa kaubang pasahero niini nasangit kini sa telephone wire sa nahisgutang lugar.

Tungod sa kadaghan sa karga nagtindog ang biktima ibabaw sa mga karga hinungdan nga wala makabantay sa   wire.

Matud pa ni traffic enforcer Manuel Tagaan sa dihang nahinabi usab sa Banat News ila pang gipaabot ang mga tagtungod sa biktima kun mopasaka ba og reklamo batok sa drayber.

Pasabot pa ni Tagaan nga bisan pa man og walay nabuhat ang drayber sa nahitabong aksidenti siya lang gihapon ang responsable niini tungod kay ang drayber man ang nagdala sa mga pasahero.

Apan matud pa ni Sumbal nga sa dihang iyang nahinabi ang tagtungod sa biktima miingon kini nga dili mopasaka og kaso batok kaniya ug magpabayad lang kini sa mga gasto sa   paglubong. – BANAT NEWS