Lolo nangulkog kinatawo

CEBU, Philippines - Nagkadugo ang kinatawo sa usa ka 14-anyos nga batang babaye human kini gikatahong gikulkog sa paryente niining 72-anyos nga lolo nga midala kaniya sa usa ka motel nga mahimutang sa Reclamation Area sa dakbayan sa Mandaue.

Gidali pagdala sa Vicente Sotto Memorial Medical Center ang bata tungod sa nahidangatan sa iyang kinatawo, samtang giubanan kini sa iyang iyaan pagdangop sa Centro Police Station sa Mandaue City Police.

Ang kapolisan sa MCPO padayong nagpangita sa lolo nga nailhang si Nicandro Duenas, minyo, taga barangay Guizo, dakbayan sa Mandaue. Si Duenas nagsilbeng lolo sa bata nga iyang gipanamastamasan tungod sa ilang pagka-paryente.

Si PO3 Wendel Belandres miasoy sa Banat News nga ang bata gidala ni Duenas sa motel niadtong Marso 9 sa alas 10 sa gabii.

Apan sa wala pa kini isulod sa motel, gisuroysuroy una sa tigulang ang bata. Pagkahuman niini, nanakay sila og taxi paingon sa Moonlight Inn.

Ang bata miasoy sa mga imbestigador nga sulod sa lawak, gimandoan siya ni Duenas sa pagpahubo sa iyang short pants ug sa gisul-ob niining T-shirt hangtod nga gihagkan siya niini.

Giasoy usab sa bata nga gipanghikap sa lolo ang mga pribadong parte sa iyang lawas.

Wala matagbaw ang lolo, gipasulod pa niini ang iyang tudlo ngadto sa kinatawo sa bata. Matud sa bata nga wala panumbalinga sa tigulang ang iyang pagping-it sa kasakit.

Ang kapolisan sa Subangdaku Police Station, ang presinto sa kapolisan nga adunay hurisdiksiyon sa maong motel mitabang sa pag-imbestigar sa kaso.

Si PO3 Roy Tolentino ug mga kaubanan sa Subangdaku Police Station misulay sa pagduaw kang Duenas sa iyang panimalay sa barangay Guizo, apan wala na igkita.

Nagtuo ang kapolisan nga nagdalidali og ikyas si Duenas human masayri niini nga giubanan ang bata sa presinto sa kapolisan aron isumbong ang iyang gibuhat nga pagpanamastamas sa bata.