2 ka police trainees gidayeg sa PRO-7
CEBU, Philippines — Wala magduha-duha sa pagtabang ang duha ka police trainees human miduol kanila ang usa ka security guard nga nangayo og tabang sa pagdakop sa usa ka gikatahong kawatan og bag sa Minglanilla Oval, lungsod sa Minglanilla, Cebu, Nobyembre 6.
Ang mga trainees nga silang Marco D. Alfanta ug Ricky A. Aldaya, kauban ang ilang Field Training Officers (FTOs) ug ubang kauban nag physical conditioning activity dihang gisangpit sila sa security guard.
Dali silang mitubag sa hangyo ug mitabang sa security guard hangtud nadakpan ang suspetsado sa gawas sa compound sa oval, uban sa tabang ni Alfanta ug sa iyang kauban. Gidala ang suspetsado ngadto sa Minglanilla Municipal Police Station alang sa hustong dokumentasyon ug legal nga proseso. Gidayeg ni Police Brigadier General Rogelio Raymundo Jr., acting regional director sa Police Regional Office 7 (PRO7), ang ilang inisyatiba pagtabang bisan wala sila sa opisyal nga pagkatungdanan.
Matud ni Raymundo, ang pagserbisyo dili lamang kutob sa opisyal nga katungdanan, kondili nagkinahanglan usab og pagkaandam sa pagtabang sa isig ka-Pilipino.
Gipakita sa duha ka trainees nga bisan wala pa mahuman ang ilang pagbansay, nasabtan na nila ang responsibilidad sa usa ka pulis nga manalipod ug moalagad sa katawhan. (BANAT NEWS)
- Latest
















