Cebu angayang iapil sa Bandila sa Nasud

CEBU, Philippines - Gihulagway ni Cebu City Acting Vice Mayor Hilario Davide III nga angayan pang tun-an sa mga historians ang balaudnon nga gipalabang ni Senador Richard Gordon nga nagtinguhang usbon ang Bandila sa nasud.

Ang Senate Bill 2590 nga nagtinguha pag-usab sa Nasudnong Bandila gikan sa walo ka bidlisiw ngadto na sa siyam ka badlis, ang walo ka bidlisiw nagsimbolo sa mga probinsya sa nasod nga giingong nakigbatok kaniadto sa mga Katsila.

Apan inay nga usa ra ka badlis ang idugang angayang dugangan pa kini aron maapil ang Cebu ug uban pang probinsya dinhi sa Kabisay-an gawas pa sa Mindanao.

Kini mao ang Batangas, Bulacan, Cavite, Manila, Nueva Ecija, Pampanga, Laguna ingon man ang probinsya sa Tarlac.

Gusto ni Gordon sa iyang balaudnon nga idugang niini ang Mindanao tungod kay giingong nibarug usab ang mga Muslim batok sa mga Katsila.

Wala hinuoy pagsupak si Davide nga usbon ang Bandila tungod kay ang maong lakang gihimo na usab sa ubang kanasuran.

Ang acting vice mayor kinsa mao usab ang acting chairman sa Cultural and Historical Affairs Commission (CHAC) dili hinuon pabor nga usa lang ka bidlisiw ang idugang.

Alang kang Davide, ang mga Sugbuanon nakigbatok usab sa mga Katsila kaniadto ug angayan lang usab nga mabutang sa Bandila.

“Kung akoy pasultihon not only Cebu even some parts of the Visayas nga ni-resist gyud batok sa mga Katsila iapil sab,” sumala ni Davide.

Nagpasalamat hinuon ang acting vice mayor sa lakang ni Gordon aron kini matun-an sa mga magsusulat ingon man sa mga nagtuon sa kasaysayan.

“It’s worth studying really, at least nga gi-bring up ni sa senador para matun-an gyud sa atong mga historians,” dugang pamahayag ni Davide.

Ang Philippine Flag nagsimbolo sa kagawasan ug panaghiusa sa mga Pilipino isip usa ka nasod ug maoy nagrepresentar sa Pilipinas. – BANAT NEWS