2 ka minor napagan sa pinusilay sa Danao

Cebu - Duha ka mga minor de edad napagan sa pinusilay nga nahitabo tali sa magkaribal nga grupo sa mga batan-on nga gituohang sakop sa lainlaing fraternities didto sa dalan F. Ralota, Poblacion siyudad sa Danao niadtong Martes sa alas 6 sa gabii.

Ang napagan  mao sila si Elmar Enriquez, 13, nga nakaangkon og tapsing nga samad pinusilan sa wala niining tikod ug Jerwin Canoy, 14, nakaangkon og samad pinusilan sa iyang walang kamot.

Samtang ang usa sa nadakpan nga suspek mao si Abequil Enriquez, 18, ulitawo, nagpuyo sa nahisgutang lugar ug wala na magtungha, samtang ang duha ka mga kauban niini nga padayong gipangita sa kapolisan mao ang duha ka pulos 17 anyos diin usa niini maoy nakaigo sa mga biktima.

Matud ni Supt. Larson Dechino, hepe sa Danao City Police Station sa dihang nahinabi sa Banat News naglingkodlingkod lang ang mga biktima sa maong lugar sa dihang mitumaw ang kagubot sa dihang nakit-an sa mga suspek ang laing grupo sa mga batan-on nga kontra nila ug maoy nangulata sa ilang grupo sa usa ka disko didto sa barangay Cambanay.

Subay sa pagsukitsukit sa kapolisan sa nadakpan nga suspek igo lang silang mibawos sa laing grupo sa mga batan-on nga ilang kontra hinungdan nga ila kining gipusil apan nakabantay og daling nakadagan pahilayo sa lugar ug ang mga biktima maoy napagan. - Darrel A. Carumba (BANAT NEWS)