Cebu Zoo tabanga'g develop sa pribadong Zoo developer

Cebu - Gisusi na sa usa ka pribadong zoo developer gikan sa kauluhan ang Cebu City Zoo niadtong miaging semana alang sa planong pagpanindot sa maong pasilidad.

Matud ni City veterinarian Doctor Alice Utlang nga nisamot ang interes ni Robert Yopangco pagpanindot sa zoo dihang personal nga nakita ang dapit nga nahimutangan niini. 

Nagkanayon si Utlang nga nipasalig si Yopangco pagpadangat gilayon og proposal ngadto sa kagamhanan sa dakbayan alang sa pagpalambo sa zoo.

Lakip si Utlang nga nakapanglantaw nga mamahimo na unyang atraksyon ang nahisgutang pasilidad sa higayon nga mahatagan og katumanan ang mga plano ni Yopangco.

Kini tungod kay giingong i-develop usab sa maong magpapatigayon ang ubos nga bahin sa zoo sama sa usa ka Rain Forest o Nature Park.

“Nindot gyud kaayo kung madayon ang plano ni Yopangco kay hasta ang ubos nga bahin sa zoo paninduton sab,” sumala ni Utlang.

Kahinumduman nga si mayor-on-leave Tomas Osmeña maoy nipahibawo kaniadto nga si Yopangco andam motabang sa siyudad pagpanindot sa zoo.

Kini taliwa usab sa lakang sa kagamhanan sa lalawigan pagbawi sa ilang luna nga nahimutangan sa nahisgutang pasilidad diha sa barangay Kalunasan.

Nasayran nga ang Kapitolyo nipadala na og demand letter sa hinapos nga bahin niadtong miaging tuig nga nagmando sa City government pagbakante sa zoo.

Apan ang maong suwat wala hatagi og igong pagtagad sa mga opisyal sa siyudad ug padayong niinsister pagpadagan sa nahisgutang pasilidad. – BANAT NEWS