Wala mailhing lalaki kit-ang naglutaw sa Shell Island

Cebu - Usa ka tiguwang lalaki nga gibanabanang nagpangidaron sa 60-anyos pataas napalgan sa mga sakop sa Cebu City Bantay Dagat nga naglutaw alas 5:30 kagahapon sa buntag diha sa may Shell Island Pier 1 ning dakbayan.

Ang biktima gihulagway sa mga imbestigador nga kasarangan ang pamanit, 5’6 ang gitas-on, nagsul-ob og maong nga karsones, polo shirt nga puwa, may markang “Lear Plan,” nagsul-ob sa panit nga itom nga sapatos.

Si PO1 Bernie Calderon sa Homicide Section sa Cebu City Police Office nga gikahinabi sa Banat News nagkanayon nga si PO1 Roderick Francia sa Cebu City Bantay Dagat ug mga kaubanan maoy nipahibalo niini.

Matud pa ni PO1 Calderon ang patay’ng lawas nakit-an usa ka kilometro gikan sa baybayon sa Shell Island.

Hinuon   way timailhang may foul play sa lawas sa biktima kun sa gawas nga parte sa lawas ang tan-awon tungod kay mga garas lang sa panit ang nakit-an.

Ang kapulisan nakakuha usab og personal nga butang sa biktima nga relo de pulso, bulawan nga singsing, P600 nga cash money.

Apan wala gyuy bisan usang dokumento kabahin na sa identification sa biktima nga gipahiluna na karon sa San Fernando Funeral Homes. – BANAT NEWS