Maestro amo giurom patay

CEBU – Usa ka maestro amo sa usa ka lantsa kinsa gituohang giurom napalgan nalang patay sulod sa maong sakyanan sayo sa buntag niadtong miaging adlaw didto sa barangay Tayud, lungsod sa Consolacion.

Ang biktima giila nga si Joel Casindak, usa ka maestro amo sa lantsa nga LCT Lacosta Quinta nga gibaradero diha sa Liloan.

Si Police Inspector Emma dela Cerna sa Consolacion Police Station mibutyag sa Banat News nga nakurat ang mga tripulanteng sakop ni Casindak dihang pagbangon nila sa kabuntagon maoy misugat sa ilang mga mata ang nagbuy-od ug wala nay kinabuhi nilang amo sulod sa lawak niini.

Ang kapolisan may tiyoriya nga si Casindak kinsa lumad nga taga barangay Taganito, Claver, Surigao del Norte nga giurom samtang naghigda kini sa duyan sulod sa iyang lawak unya dihang mikisikisi kini nahagbong sa sawog ug nabundak ang bagolbagol nga maoy hinungdan sa hinanali niyang kamatayon. – BANAT NEWS