3 ka magsuon patay sa falls

CEBU - Gibasol ang mga engkanto nga maoy responsable sa pagkalumos sa tulo ka magsuon niadtong Sabado sa udto didto sa “Sungabon Falls” Mananga River barangay Campo Siete, lungsod sa Minglanilla.

Ang nangamatay nga managsuon giila sa kapolisan nga sila si Maria Michelle Geonson, 21, 2nd year high school, Charity Goenzon, 12, grade 3, ug Erwin Geonzon, 7, grade 1, pulos nagpuyo sa nahisgutang bukirang barangay nga may gilay-ong dul-an sa 30 kilometros gikan sa Poblacion, Minglanilla.

Si Kapitan Elsa Repunte sa barangay Campo Siete nga nahinabi sa Banat News mitug-an nga hilan gyud ang maong dapit ug niadtong 1993 dunay usa ka 13-anyos nga batang babaye ang nalumos sa tupad nga linaw nga Malingin.

“Dimalas man gyud nang pangalang Sungabon maoy tabi-tabi nga dunay mga engkanto, naay Mantaga kanang murag kugita ba niadto pang hilan nga lugar,” sumala pa ni   Repunte.

Nunot niini butangan nila karon og karatula nga idili na ang pagpangaligo sa nahisgutang falls.

“Kinsa tong gustong maligo sa dapit dili na pakaligoon suwatan nga dunay nanuyop nga Mantaga,” dugang pa niini.

Samtang plano usab niini nga ipakoral ang lugar kun aduna na unya sila'y pundo nga makuha gikan sa ilang munisipyo aron dili na makasulod kadtong gustong maligo.

Sumala pa niini nga risgo gyud   niadtong mga tawo nga mopugos og kaligo sa maong dapit bisan pa man kun idili kini.

Samtang ang kabahin sa pagpahiluna sa mga biktima, ang munisipyo sa Minglanilla maoy migasto sa lungon, samtang ang pagpa-embalsamar ang agawon ni Maria Michelle ug ang taga barangay maoy nagtampo- tampo niini.

Karong hapon, ang patay'ng lawas sa tulo ka biktima nga sila si Maria Michelle, Charity ug Erwin ang ilubong.

Si SPO1 Renato Masangacay nga gikahinabi sa Banat News nagkanayon nga nakadawat sila og taho sa insidente   niadtong Sabado na sa gabii   hinungdan nga daling mirespondi sila si SPO4 Remegio Elacion, ang OIC sa Minglanilla ug mga kaubanan didto sa dapit.

Matud pa nga ang mga ginikanan nga sila si Eduardo ug Porperia, mibutyag nga busy usab   ang amahan nanguha og kahoy samtang ang inahan nanglaba didto sa laing lim-aw.

Apan ang 7-anyos nga manghod nga si Erwin gikatahong miuna og sawom sa falls nga may gilawmong kapin sa napulo ka tiil sa dihang nakit-an sa maguwang nga 12-anyos nga Charity nga nagkapa-kapa gumikan kay dili kahibalo molangoy.

Miambak si Charity aron luwason si Erwin apan dili usab kini makamaong molangoy   hinungdan nga naglambiyong sa tubig ang duha.

Ang kinamaguwangang si Maria Michelle kinsa dili usab kamao molangoy naluoy nga nagsud-ong sa iyang duha ka manghod, miambak kini sa lim-aw   hinungdan nga silang tulo ang nakabsan sa kinabuhi bisan pa man kun nahaw-as sa lim-aw sa ilang mga kaliwat nga mga minor de edad.

Ang managsuon gidala pa unta sa Minglanilla District Hospital apan gideklarar sila nga dead-on arrival sa mga mananambal. – BANAT NEWS