Saavedra wa moadto sa NLRC hearing bahin sa reklamo

CEBU - Sa makausa pa wala tungaha sa nagpailang ‘whistleblower’ nga si Crisologo Saavedra ang husay sa labor case nga gipasaka sa iya kanhing mga empleyado.

Kagahapong adlawa, mao nay ikaduhang adlaw sa husay sa kaso nga gisang-at sa mga kanhi empleyado ni Saavedra diha sa National Labor Relations Commission (NLRC-7).

Gawas nilang Iron Pono, Jocelyn Mabanto, Hilda Abante ug Elviro Quita, lakip sa nagpaabot kang Saavedra kagahapon mao si labor arbiter Philip Montances.

Nagpadala hinuon si Saavedra og representante nga maoy nagpahibawo sa iyang kapakyas pagtunga sa gitakdang hearing.

Gipasabot sa representante nga si Saavedra dunay gitakdang panagtagbo uban sa “presidente” hinungdan nga kini wala katunga sa husay.

Apan nidugang ang mensahero nga dili mosugot si Saavedra nga dunay mahitabong sabot-sabot tali sa iyang mga kanhi empleyado.

Dugang sa representante nga si Saavedra gustong ipadayon ang husay sa kaso ug kini andam niyang atubangon.

Tungod sa maong kalambuan, ang labor arbiter nimando pagsumitir og position paper sa duha ka habig hangtud sa Nobiyembre 24.

Wala nay laing nahimo ang mga kanhi empleyado ni Saavedra kun dili ang pagtuman na lang sa gimando ni Montances.

“Mangita na lang mi ani og abogado nga makatabang namo paghimo og position paper kay wala man gyud moatubang si Saavedra namo,” sumala ni Elviro Quita.

Ang mga reklamante nisang-at og reklamo batok sa ilang kanhi agalon human taktaka sa ilang gitrabahoan nga Essence Spa diha sa SM City Cebu.

Gawas niini niingon ang mga reklamante nga wala usab sila hatagi ni Saavedra sa tukmang suhulan ug mga benepisyo sibo sa nalatid sa balaud. - BANAT NEWS