Sikyu miuwang sa away napatay
CEBU - Patay na nga miabot sa tambalanan ang usa ka security guard human kini maamong sa panaglalis sa magtiayon diha sa sitio Villa Manga, barangay Opao dakbayan sa Mandaue kagahapon sa kaadlawon.
Ang biktima mao si Joel dela Cruz, 30, lumad nga taga Barili ug sakop sa Negrense Security Agency nga anaa madestino sa usa sa mga tunghaan diha sa maong barangay. Samtang ang suspetsado mao si Virgilio Jumamoy, 44, nagpuyo sa maong dapit ug lumad sa Tubigon lalawigan sa Bohol.
Matud pa ni Jumamoy nga atol sa ilang panaglalis sa iyang asawa kalit lang miinterbener si dela Cruz sa ilang away ug gumikan sa kahubog niya iyang nadunggaban sa gibitbit nga kutsilyo si dela Cruz.
Sa imbestigasyon usab ni MCPO Homicide Section Chief Insp. George Aninon nasuta nga si dela Cruz on duty atol sa maong pagkahitabo sa tunghaan nga iyang gialagaran, apan gumikan kay napawong na ang iyang cellphone mitabok kini sa atbang aron mohulam og charger sa iyang higala.
Atol sa iyang paghulam og charger sa pikas balay sa iyang higala iyang nasaksihan ang panag-away sa magtiayong Jumamoy ug sa dihang mopauli na unta siya mihapit kini sa nagkalalis nga magtiayon ug igo lang kini mibadlong nga dili lang palabian ang asawa ni Jumamoy.
Gumikan sa maong pulong kalit nga gidunggab si dela Cruz ni Jumamoy hinungdan sa pagkahiagum sa samad dinunggaban sa walang bahin sa dughan niini ug patay nang niabot sa tambalanan.
Si Jumamoy buot untang mosibat sa maong krimen nga iyang nahimo apan nasugatan niini si PO1 Illuben Bucog usa ka FTP ug PO1 Pasaylo Bandilin nga nagpatrolya niadtong tungura.
Tungod sa nagkadugong sinina ug mga kamot niini gisitar siya sa duha ug diha na marekober kaniya ang napulo ka pulgadang kutsilyo nga maoy giingong gigamit niini pagdunggab kang dela Cruz hinungdan sa iyang pagkadakop. (BANAT NEWS)
- Latest
- Trending