Forum sa Centcom sa Aloguinsan gibulabog og rally

Nabulabog ang gipahigayong symposium sa mga sakop sa 3rd Civil Relations Office sa Central Command diha sa munisipyo sa lungsod sa Aloguinsan kagahapon sa alas 10:00 sa buntag human ang grupo sa Bayan Muna Central Visayas kalit lang niasdang ug nag-rally batok sa militar.

Matud pa ni Lt. Gen. Pedro Ike Inserto, commanding general sa Central Command ang grupo ni Lt. Col. Oscar Lasangue, unit commander sa 3rd Civil Relation Group maoy naatlan sa protesta atol sa ikatulo ka semanang pagpahigayon og “pulong-pulong.”

Ang “pulong-pulong” sa militar sa mga molupyo maoy pamaagi aron mapasabot ang mga taga lungsud ilabi na niadtong mga dapit nga gihugpaan og impluwensya sa mga rebelde.

Matud pa ni Inserto nga ang grupo nila ni Lasangue uban nila ni Mayor Cynthia Moreno ug mga local nga officials nipahigayon sa maong symposium uban sa mga residente.

Sa kalit lang niabot ang mga militante nga mokabat sa 15-20 ka miyembro ug nihimo og kinalit nga rally atubangan sa munisipyo ug nanawagan sa pagpapahawa sa presensya sa 78 Infantry Battalion nga nagbase sa maong lungsod.

Apan imbes abugon giawhag hinuon sa militar ug mismo ni Mayor Moreno ang grupo pagsaka sa entablado aron ilang mapadangat ang ilang reklamo batok sa militar atubangan sa publiko.

Ang mga militante mipasangil nga ang militar nanalipod lang sa mga adunahan ug yutaan apan dihang gihatagan og higayon mopadayag sa ilang habig diha sa entablado midumili ang mga militante ug nanglakaw.

Matud pang Inserto higayon na unta kadto sa mga militante nga makapadayag ilabi na sa isyung ilang gipangbatbat sanglit diha ang mga opisyal sa Municipal Agrarian Office.

Gipasabot ni Inserto nga gisakitan ang mga militante sa presensya sa 78th IB gumikan kay ang maong lungsud gihulagway nga ‘white area’ diin dunay suportang nadawat ang mga rebeldeng New Peoples Army.