Automated election sa 2010 hayan madayon

CEBU - Dako ang posibilidad nga mahinayon na ang gipaabot nga automated election system sa nasud atol unya sa umaabot nga 2010 elections sa pangagpas ni Cebu City Election Officer Atty. Marchel Sarno kung walay masugatang problema ang Comelec sa maong lakang.

Partikular na niini ang mga nag-unang dapit sa nasod sama sa National Capital Region (NCR) ug mga dakbayan sa Sugbu, Davao ug uban pa.

Nasayran nga wala pa itugot sa kongreso ang gipangayong budget sa Comelec alang sa maong katuyoan nga giingong mokapin sa P20 bilyones pesos.

Ang maong kantidad una nang gihulagway ni Senadora Miriam Defensor Santiago nga dako ra alang sa usa ka third world country sama sa Pilipinas.

Apan taliwala niini usa ka resolusyon ang gipalabang ni Senador Richard Gordon nga nanawagan alang sa poll automation sa tuig 2010.

Sa samang higayon, ang Senate Resolution 567 ni Gordon nagpugos usab sa Comelec nga motrabaho sa ilang gimbuhaton ubos sa balaud.

Kini aron maseguro nga limpyo ug walay tikas, malinawon ug makiangayon ang matag pagpahigayon og eleksyon dinhi sa nasod.

Apan matod ni Sarno nga sila walay problema niini ug andam mosunod sa bisan unsang paagi sa piniliay ang sagupon sa gobiyerno.  (BANAT NEWS)