Gipanuhot naghikog

CEBU – Usa ka tawong gihilantan ug nagkurogkurog gumikan sa panuhot, wala makaantos sa maong sakit ug naghikog patay didto sa barangay Lamintak Norte, Medillen, Cebu kagahapon sa alas 2:00 sa kaadlawon.

Apan niana nang pagka alas 5:00 sa buntag kagahapon nakit-an sa mga silingan ang patay’ng lawas niini nga nilagom na og nagbitay sa puno-an sa Ipil-ipil.

Ang nagpakamatay mao si Teofisto Nolla Jr., 38, minyo nga taga Sitio Cabatuan, Lamintak Norte.

Si PO1 Joje Magdadaro sa Medillen Police Station mibutyag sa Banat News nga si Susana Nolla, hingkod, ug asawa sa naghikog, miingon nga nananghid ang iyang bana nga molarga ngadto sa dakbayan sa Sugbu kay magpahiling sa doctor niadtong milabay’ng adlaw.

Mitug-an ang asawa nga usa na ka semana kapin nga gihilantan ang biktima ug nag-antos kini sa pagpangurog sa iyang kalawasan ug kabukogan tungod sa panuhot apan iya lang kining gidala -dala ug wala gyud magpahiling og doctor ug wala usab motumar og tambal.

Apan nakurat si Susana dihang nasayran niya kagahapon sa sayo sa buntag nga patay na ang iyang bana nga nagkombitay sa puno-an sa Ipil-ipil duol sa balay sa ginikanan niini.

Matud ni PO1 Magdadaro nga lagom na ang lawas sa namatay kansang tumoy sa pisi nga nylon gihikot sa iyang liog ug ang pikas tumoy niini gigaid sa sanga sa Ipil-ipil. – BANAT NEWS