Talisay traffic division wa moresponde

Hepe sa traffic division sa dakbayan sa Talisay SPO4 Henry Obiso ang gipasanginlan sa usa ka drayber nga wala miresponde dihang iyaha kining gihangyo tungod kay gikulata ang iyang anak niadtong Martes sa hapon diha sulod sa merkado publiko sa barangay Tabunok.

Si Zaide Bacus, 41-anyos, residente sa barangay Lagtang ug drayber sa multicab nga dunay rotang Jaclupan-Tabunok mibutyag sa Banat News nga sa nahisgutang adlaw gisugo niya og papalit og bugas ang iyang anak nga si Max Stephen Jones Bacus.

Matud niini ang amahan ug igsuon sa kapuyo sa iyang anak inubanan sa laing upat ka mga lalaki maoy nagtabang pagkulata tungod sa pasangil nga gidagmalan niini ang ilang anak nga babaye.

Gitumbok ni Bacus nga mikulata sa iyang anak mao sila si Bobby Pamatong ug anak niining si Warren samtang wala mailhi ang laing upat nila ka kauban dihang ilang nakit-an sa nahisgutang merkado.

Si Max ug ang kapuyo niini  duna nay duha ka anak apan nagkabuwag na.

Human sa pagpangulata nakadagan ug nakapangayo og tabang si Max sa amahan kinsa diha sa paradahan sa Tabunok, tungod niini daling gikuyogan ni Zaide ang anak diha sa ubos sa buhatan sa traffic division.

Si Obiso ug SPO2 Marlon Reyes nga naglingkod diha sa maong buhatan maoy ilang gihangyo nga dakpon ang mga suspek apan gikatahong giingnan  lang siya ni Obiso nga sa homicide ang maong trabaho.

Gawas niana wala nay laing ayudang gihatag ang maong mga polis human sila sultihi kung unsay buhaton ug mao usab ang mitawag sa homicide section office.

Tungod niini nasagmuyo si Zaide sa maong mga polis gumikan kay niana gyung tungura dayon nila gikinahanglan ang maong mga polis apan wala sila tabangi niini.

Miabot pa og kapin kinse minutos una pa miabot ang mga sakop sa unit nga gitawgan ni Obiso maong sa ilang pag-abot wala na diha ang mga suspek.

Si Obiso sa iyang bahin, sa pakighinabi niini sa Banat News nagkanayon nga aduna silay nadungog nga taho nga dunay babaye nga gikulata diha sulod sa merkado ug pagkataud-taod miabot si Zaide ug misumbong nga ang iyang anak ang gikulata diha sa sulod sa merkado.

Matud ni Obiso nga gusto ni Zaide nga pakuyogon sila diha sa lugar nga nahitaboan aron istoryahon ang mga suspetsado apan aron sa paglikay sa kasamok mibalibad sila.

Tungod niini giawhag ni Obiso si Bacus ipa-blotter ang maong insidente ngadto sa police station sa barangay Poblacion o ba kaha isumbong niya ang mga suspetsado ngadto sa barangay aron sila adto maghusay.