Vintage bomb napalgan sa Toledo

Usa ka  vintage bomb nga gituohang gigamit pa sa mga Hapon sa milabay’ng ikaduhang gubat sa kalibutan ang nakuykuyan sa tugkaran sa Toledo Power Corporation (TPC) sa barangay Sangi siyudad sa Toledo niadtong Miyerkules sa alas 10:20 sa buntag.

Ang gwardiya sa maong kompaniya nga si Ernesto Sumbilon maoy pormal nga ni-turn-over sa nakaplagan nga bomba sa buhatan sa kapulisan.

Matud ni SPO2 Larry Pili sa Toledo City Police dihang nahinabi sa Banat News ang mga kawani sa maong kompaniya maoy nakakita sa maong bomba dihang gihakot niini ang mga abo sa carbon nga maoy gigamit nga sugnod sa TPC.

Ang maong bomba gihulagway kining aktibo pa og peligrong mobuto bisan unsang orasa ilabina kun pasipad-an.

Subay sa imbestigasyon sa kapulisan nakuykuyan ang maong bomba nga nalubong na unta sa mga carbon nga abo sa maong TPC dihang gi-“bulldoz” kini ug gikarga sa trak aron ilabay.

Gibana-bana ni SPO2 Pili nga moabot og 14 inches ang gitas-on sa maong vintage bomb nga susama og paa sa tawo ang gidak-on.

Ang maong bomba kasamtangan karung gideposito sa buhatan sa kapulisan samtang nagpaabot sa direktiba gikan sa Cebu Police Provincial Office (CPPO).