Nag-birthday nabuk-an sa ulo, patay

Nabuak ang ulo sa motorista ug angkas niining minor de edad nga nagsaulog sa iyang birthday human  mibangga sa gikasugat niining Ceres bus liner sa kurbadahon nga lugar didto sa barangay Poblacion, lungsod sa Alcantara, Cebu niadtong milabay’ng gabii.

Ang mga namatay nga biktima giila nga sila si Arnulfo Ricafranca Marinas,23, ug Keith Mark Sabillo, 17, pulos molupyo sa barangay Planas sakop sa maong lungsod.

Ang biktima nga si Sabillo nagsaulog sa iyang ika-17 ka tuig nga sumad sa iyang adlaw’ng natawhan atol sa maong insidente.

Matud ni PO1 Nestor Tonilon imbestigador sa Alcantara Police Station dihang nahinabi sa Banat News gikan sa siyudad sa Sugbo ang Ceres nga gimaneho sa usa ka Ramon Perater samtang gikan sa lungsod sa Moalboal ang mga biktima ug paingon na untang mopauli sa barangay Palanas.

Apan paghiabot niini sa maong kurbadahon nga lugar tungod sa kakusog sa pagpadagan sa mga biktima mikawat kini og linya ug wala mabantayi niini ang ilang gikasugat nga Ceres bus.

Matud ni PO1 Tonilon nasentro gyud ang pagbangga sa maong motorsiklo ug Ceres bus maoy hinungdan nga nalabay ang duha ka mga biktima gikan sa ilang gisakyan nga motor ug nabunal ang mga ulo niini sa aspaltado nga karsada ug nabuak.

Matud ni PO1 Tonilon nga ang municipal health officer sa lungsod nga si Dra. Norita Lagada maoy mideklarar nga patay dihadiha silang Marinas ug Sabillo tungod sa grabeng kadaot nga naangkon sa mga ulo niini nga nabunal sa karsada.

Hinuon ang drayber boluntaryong mitahan sa iyang kaugalingon sa kapolisan ug nagtingkagol na karon sa detention cell sa Sibonga apan posibleng mabuhian kini human matud pa ni PO1 Tonilon nga dili na interesado pa ang mga tagtungod sa biktima nga mopasaka og kaso ug magpabayad nalang kini sa tanang gastuhan pagpalubong sa mga biktima.