Dev't permit sa Monterazza gi-revoke ni Tomas
Gi-revoke na ni Mayor Tomas Osmeña kagahapong adlawa ang development permit nga gi-isyu sa dakbayan sa Sugbu ngadto sa Landco Pacific Corporation.
Kini tungod usab sa pagdahili sa lapok gikan sa gitrabaho niini nga Monterrazas de Cebu, nga mitugpa sa pipila ka kabalayan nga anaa sa ubos nga bahin sa barangay Guadalupe.
Ang Landco mao ang land developer sa Monterrazas de Cebu nga
Ang pagbaha og lapok natigayon sa dihang mibundak ang kusog nga ulan sa dakbayan niadtong miaging adlaw, dala sa bagyong Ambo.
Gawas sa pag-revoke sa Development Permit, ang kontraktor gimanduan usab ni Osmeña nga ipadayon ang pagbuhat niini og mga retention pond, paghabwa sa lapok ug uban pa.
Ang retention pond nga susama sa mini dam, maoy himuong panagang sa tubig kun dunay ulan nga dili dayon moderetso paingon sa ubos nga bahin.
Tungod sa pagrebokar sa development permit, dili na makapadayon ang Landco Pacific Corporation sa pagtrabaho sa nahisgutang proyekto.
Gitataw hinoon ni Osmeña nga mahimong mahatagan og laing development permit ang maong developer kun kini makakumbinser sa siyudad sa himuon niining mga safety measure.
“We may consider of granting it again but the burden of proof is on them that they have taken enough measures and steps,” sumala sa mayor.
Gipahunong na ni Osmeña ang nahisgutang land development kaniadto tungod sa iyang kabalaka nga mahitabo ang mudslide, hangtod nga kini mihimo og mga retention pond.
Midugang ang mayor nga kun duna pay mahitabo unya nga mudslide, dili na niya hatagan og kahigayunan ang developer nga mapadayon ang maong proyekto.
“I’m just sending a very clear message that if this happens again, that’s it, so, they’re playing with fire,” dugang pamahayag ni Osmeña.
Sa susamang kalambuan, nagplano ang mayor nga ibalhin og laing dapit ang mga pamilya nga naapektahan sa nahitabong mudslide.
Wala hinuon motataw si Osmeña kun asa ug kanus-a ibalhin ang apektadong mga pamilya kansang mga pinuy-anan gibahaan ug nasudlan sa lapok.
- Latest
- Trending
