Butete makahilo gyud – BFAR

Nipasidaan ang kadagkuan sa Bureau of Fisheries and Aquatic Resources (BFAR-7) sa mga molupyo   sa isla sa Bantayan apil na sa tibuok Central Visayas nga likayan ang pagkaon sa mga isda nga makahilo sama sa butete kon tikong.

Ang Assistant Regional Director sa BFAR-7 Allan Poqueta niluwat niining maong pasidaan human sa pagkahilo sa pipila ka mga molupyo didto sa barangay Malbago lungsod sa Madredijos diin usa namatay nga si Jose Abner Batbatan ug laing 12 ang naangol ug nalandig sa tambalanan tungod sa pagkaon sa isdang butete.

Matud pa ni Poqueta nga makahilo gyud ang isda nga butete tungod  kay dunay parte sa lawas niini ubos nga bahin sa kapay sa maong isda nga maoy tinubdan sa hilo.

Gipasabot ni  Poqueta atol sa interview sa DyDD nga mas mosamot ang ka pilegro sa isdang butete ilabina kun luto-on kini nga hapit na madubok tungod kay posibleng dili na matarong ang paghugas ug masagol na sa unod niini ang hilo.

Giklaro  ni  Poqueta nga isda nga butete gyud ang nakaon ug nakahilo sa mga molupyo  sa barangay Malbago human gipadalhan sila og specimen niini nga nahipos.

Gani ang sample nga ilang nahipos ilaha karung gipaubos sa laboratory examination.

Nagkanayon si Poqueta nga sa matag pahigayun nila og seminar kanunay nilang balikbalikon ang pagpahimangno sa dili pagkaon sa isdang butete aron paglikay sa peligro hinungdan nga gikahimangod niya nga hangtud karun duna gihapoy pipila ang mopugos gyud og kaon niining maong matang sa isda. (Uban sa report ni Wen Celen)