Manager sa radyo gidakop

Manager ingon man komentarista sa Aksiyon Radyo Cebu Carlo Duga-Duga nasikop kagahapon sa udto diha sa iyang gialagarang estasyonan nga nahimutang sa Tangke,  Talisay gumikan sa duha ka   kasong libel ug gitanggong sa Detention  cell sa Talisay City Hall.

Si Duga-Duga nasikop mga alas 11:55 ni SPO2 Gerome Abatayo ang warrant server sa kapolisan sa dakbayan sa Talisay tungod sa warrant of arrest nga giisyo ni Regional Trial Court (RTC branch 5) Judge Douglas Marigomen nga gipetsahan og Enero 30, 2008

Sa usa ka libel case ang korte mibutang og P40 mil  nga piyansa, samtang P30 mil   usab sa ikaduhang libel case.

Ang maong kaso naglambigit kini kaniya isip station manager sa Aksyon Radyo Cebu human si  Bise Gobernador Gregorio Sanches Jr.  mipasaka og kaso  kang Gilbert Wagas, sa blocktime program niining “Wagas ug Gawasnon” matag 12:30 ngadto sa 2:30 sa hapon matag adlaw hangtod sa adlaw’ng  Sabado.

Si Duga-Duga nga gikahinabi sa Banat News miingon nga ang maong kaso niadto pa kining tuig 2005 diin si Wagas mipadayag og mga pulong nga nag-awhag sa Bureau of Food and Drugs (BFAD) nga susihon ang gibaligya nga produkto sa bise gobernador nga Lacto Pafi gumikan kay gipatuo kining makaayo sa sakit  "without therapeutic claim food supplements".

Hinuon mapasalamaton siya sa mga opisyal sa KBP gumikan sa suporta nga gihatag ngadto kaniya pinaagi sa P10 mil   nga  piyansa nga  gikan sa pundo  sa KBP.