Polis nasakpang nanigarilyo ipalabay

Ipalabay og laing police station ang polis nga nasakpang nanigarilyo sulod sa kampo sa Cebu Provincial Police Office (CPPO).

Si SPO1 Lorenzo Gutang sakop sa Toledo Police Station nakit-ang naglakaw ug nanigarilyo sulod sa kampo niadtong Lunes sa buntag ni CPPO Director Sr. Supt Carmelo Valmoria samtang nagsakay kini sa iyang service vehicle paingon mosulod sa kampo.

Gawas pa niini lain nga wala mauyoni ni Valmoria mao nga ang uniporme sa maong polis gisapawan og polo.

Tungod niini gipahunongan  ni Valmoria sa iyang driver si SPO1 Gutang og dihadiha gimanduan gilayon nga paadtuon sa iyang buhatan og ipadala ang upos sa iyang sigarilyo.

Nahapnan nalang og pinaabot si Valmoria wala gyud magpakita ang maong polis.

Gumikan sa nahimong kasaypanan sa maong polis si Valmoria mimando gilayon nga iyang ilabay og laing police station si Gutang ngadto na sa Tudela Police Station.

Base sa patakaran sa PNP walay gitugotan nga manigarilyo sulod sa kampo o bisan sa gawas sa kampo dili puweding manigarilyo.

Apan giklaro niini kung off duty ang usa ka polis mahimong makapanigarilyo apan adto sa ilang balay dili usab sa kampo.