Dul-an 600 nanga dakpan ubos sa SCI

CEBU, Philippines — Mikabat sa 562 ka tawo ang nadakpan ug P198,400 nga multa ang nakolekta sa 308 ka police operations sa tibuok Cebu Province atol sa pagpatuman sa Anti-Criminality Plan ubos sa Safer Cities Initiative niadtong Sept. 7.

Base sa report sa Cebu Police Provincial Office (CPPO), 360 ang gipamulta, samtang 202 ang gipahimangnoan lang tungod sa mga ginagmay nga kalapasan sa mga lokal nga ordinansa.

Ang kampanya nakatutok sa mga paglapas sa sa traffic ordinances sa mga LGUs apil ang pag-inom ug pagpanigarilyo sa publikong lugar, paglakaw sa dalan nga walay sapot sa ibabaw, paglapas sa curfew sa mga menor de edad ug uban pang kalapasan nga may kalabotan sa public order.

Lakip sa mga natala nga paglapas ang 72 ka kaso sa pag-inom sa publikong lugar, 36 ka smoking violations, 37 ka tawo nga nagsuroy nga walay sapot sa ibabaw, 52 ka menor de edad nga nakalapas sa curfew, usa ka karaoke violation, duha ka kaso sa pagsul-ob og balaclava, duha ka road-clearing violations tungod sa ilegal nga mga obstruction, ug duha pa ka ubang paglapas sa lokal nga mga ordinansa.

Pinakadaghan sa mga natala mao ang mga paglapas sa traffic ordinances kay 360 ka violators ang gipamulta.

Matud ni CPPO Provincial Director PCOL Abubakar Udang Mangelen Jr., dili lang ang pagdakop ug pagpamulta ang tumong sa kampanya kondili usab ang pagpalambo sa disiplina, responsableng pamatasan ug pagsunod sa mga balaod ug lokal nga ordinansa.

Giawhag sa CPPO ang publiko nga magpadayon sa pagtabang sa kapulisan pinaagi sa pagsunod sa mga ordinansa aron mapadayon ang kalinaw ug kahapsay sa mga komunidad sa tibuok lalawigan sa Sugbo.— IBM BANAT NEWS