Aircraft technician napalgang patay sa hotel

Usa ka aircraft technician ang napalgang patay ug may mga gituuhang agi sa samad dinunggaban sa kalawasan sulod sa kasilyas sa lawak sa usa ka hotel nga iyang giabangan diha sa dalan Salinas Drive sa barangay Lahug kagahapon sa buntag.

Ang namatay giilang si Roberto Alemania, 56, taga Casili Subdivision sa dakbayan sa Mandaue apan diha na nagpundo sa maong hotel sukad sa pag-abot niini gikan sa gawas sa nasud sa Trinidad Tobago duha na ka adlaw ang nakalabay.

Sumala pang PO1 Edario Manatad sa Homicide Section sa pakighinabi sa Banat News kagahapon ang anak nga lalaki ni Alemania mitug-an kanila nga duna silay sabot sa iyang amahan nga magkita diha sa maong hotel kagahapon sa buntag.

Apan nahibulong kini nga bisan giunsa niya og panuktok sa pultahan wala gyud siya ablihi hinungdan nga nagpatabang siya sa mga kawani sa maong hotel apan mao nalay ilang kahibulong nga nagkatag ang mga gamit sa biktima.

Dihang ilang gisusi ang banyo diha nila makit-i si Alemania nga  wala nay kinabuhi ug naglunang sa kaugalingong dugo  hinungdan nga dali silang nangayo og tabang sa kapolisan.

Sumala pang Manatad base sa ilang pakisusi dunay timailhang dunay panagbugno nga nahitabo diha sa sulod sa maong lawak  tungod sa mga nagpasad nga kabtangan ni Alemania.

Nasuta usab nga dunay lima ka mga gagmay’ng tinudyukang samad diha sa dughan sa biktima ug duna pay laing mga samad diha sa iyang nawong ilabi na duol sa mata nga gituuhang hinungdan sa kamatayon niini.

Nadiskubrehan usab sa kapolisan nga nawagtang na ang cellphone, relo de pulso ug pitakang gituuhang dunay sulod nga kwarta sa biktima diha sa maong lawak.

Nagduda ang mga imbestigador nga posibleng nakaila ang biktima sa mamumuno ug posibleng iya kining gipasulod tungod kay walay nakitang ‘force entry’ diha sa maong lawak nga timailhang mipugos og sulod ang mga mamumuno.

Usa sa anggulong gitutukan mao ang tulis tungod sa mga nangawagtang nga butang ni Alemania apan sa pagkakaron wala pay testigos nga mitumaw diha sa ilang buhatan.

Sumala pang Manatad nianang sayo pa sa milabay’ng gabii nagpamasahe pa ang biktima diha sa iyang lawak ug nakit-an usab kining migawas sa maong hotel.

Walay nakitang hinagiban diha sa crime scene kagahapon nga posibleng maoy gigamit sa pagpatay kaniya.