Bitang nasuya ra – Kap. Ocarol

Si kapitan Romeo Ocarol sa Barangay Pasil mihulagway kang konsehal Mario Bitang nga nasuya lang sa mga programa nga iyang gipatuman diha sa ilang barangay labi na gayud sa ilang Barangay Water Refilling Station nga nagmaayo na ang kita human iyang gipaayo.

Una niini si konsehal Bitang nipadayag nga nibiya siya sa kampo ni kapitan Ocarol ug nidagan sa pagka kapitan kini tungod kay gusto siyang maputol na ang kurapsyon diha sa ilang barangay ubos sa pagdumala sa maong kapitan.

Si  Ocarol nga nahinabi sa Banat News   mipadayag nga ang tanang pamasangil   ni Bitang walay kamatuuran ug bunga lang kini sa kasuya tungod kay ang mga dokumento ingon man resibo sa tanang mga taxes koleksyon sa ilang barangay tua na kini karon sa Commission on Audit ingon man sa City Treasurer's Office ug sa buhatan sa Ombudsman human nisang-at  og kaso ang konsehal.

Matud pa niini nga wala siya mahulga sa bisan unsang kaso nga gipasaka ni Bitang kini tungod kay aduna siya'y mga dokumento nga makapamatuod sa pamasangil nga tataw kaayong gitumong lang panahon sa election.

Iyang giklaro nga nasuya lang si Bitang sa ilang Barangay Water Refilling Station diin ka kompetensiya sa negosyo niini sa tubig nga barato kaayo ikumparar sa tubig ni Bitang nga dili maayo ang kalidad ug gibali pa nga ang ilang tubig sa barangay maoy hugaw.

Iyang giklaro nga nasuko si Bitang human iyang gipadayon ang pagpatuman sa ilang Water Refilling Station kini tungod kay nakita niini nga alkanse gyud si Bitang sa kaugalingong negosyo sa tubig gumikan sa kabarato sa barangay.

Dugang pa niini, mipasangil siya kang Bitang nga  naniid lang daan sa mga dagkong koleksyon sa barangay  ug nakita niini nga mi-click ang tubig nga negosyo sa barangay nga diin mao sab ang kompetensiya ni Bitang, apan ang pasangil sa mga resibo ug uban pa dili kini tinood kay matag session sa barangay o sa matag tulo ka bulan ang konseho hatagan gyud og husay labot sa kinitaan sa barangay.

Nunot niini iyang gihagit si Bitang nga dili mosibog sa kandidatura gumikan kay iyaha pa kining hatagan og dugang 300 botos sa ilang katawhan kini aron madugang-dugangan pa ang botos niini nga tataw na kaayong dili makadaog sa piniliay.

Sa nasayran nga si   Bitang nipasangil kang kapitan Ocarol nga wala maka-liquidate sa kapin sa 8 milyones nga kita sa tubig nga walay resibo ug uban pang koleksyon sa Barangay Pasil gikan sa 2000-2006.