Aborsiyon misaka sa Kabisay-an

Samtang gikataho ang pagsaka sa kaso sa Human Immuno-Deficiency Syndrome (HIV) sa Sugbu, laing gikaalarma ang pagsaka usab sa gidaghanon sa kaso sa aborsiyon sa kababayen-an sa Kabisay-an bali og 50 porsiyento.

Base sa pagtuon sa Alan Guttmacher Institute, nasuta nga sa matag usa ka libo ka kababayen-an nga magmabdos, 17 kanila ang magpakuha sa gisabak pinaagi sa aborsiyon.

Sa tuig 1994, 11 ka kaso sa aborsiyon ang natala sa matag usa ka libo ka kababayen-an nga nagpangidaron og 15 ngadto sa 49 anyos samtang 17 na matag usa ka libo ka babaye sa tuig 2000.

Gani mas taas pa ang average rate sa Central Visayas diin nasakop ang Sugbu sanglit 24 ka babaye matag usa ka libo ang momabdos nga mosangko sa aborsiyon.

Base sa pagtuon sa Guttmacher nga ang dili kagustuhan nga pagpamabdos miresulta sa aborsiyon bisan kini ilegal nga paagi.

"In the Visayas, 44 percent of all pregnancies are unintended," nagkanayon ang report sa Guttmacher.

Dugang sa maong taho mao nga 9,000 ka babaye sa Kabisay-an ang malandig sa tambalanan gumikan sa komplikasyon sa induced abortions.