Jueteng lord vs Praise the Lord

Miapelar kagahapong adlawa ang mga abogado ni Anthony John Apura kinsa nasentensyahan og 14 ka tuig nga pagkabilanggo human kini gitudlong accomplice sa krimen labot sa pagpusil patay kang Mark James Enriguez niadtong Hulyo 19, 2003.

Una niini si Apura ug si Sherwin Que kinsa sakop sa Akrho  gisilutan ni rtc Judge Bienvenido Saniel niadtong miaging adlaw nga mabilanggo si Que og 40 ka tuig samtang si Apura 14 ka tuig.

Si Atty. Democrito Barcenas usa sa mga abogado ni Apura miduso og motion ngadto sa sala ni Judge Saniel nga ipabilin lang ang 100 mil pesos nga piyansa sa iyang kliyente samtang ila pang-gipreparar ang motion for reconsideration sa conviction niini.

 Matud pa niini nga walay igong basehan ang mga kabalaka sa kaatbang nga mosibat ang iyang kliyente palayo sa nasud tungod kay  si Apura niadto pang  2003 nikooperar sa korte ug sa mga awtoridad.

 Subay niini iyang gipahibalo nga karong Lunes moduso na usab sila sa ilang motion for reconsideration sa sala ni   Saniel labot sa pagka-apil sa iyang kliyente sa murder nga kaso.

 Matud pa niini nga gitahod niya ang desisyon sa huwes apan duna siya'y nakita nga dili unta mamahimong accomplice ang iyang kliyente sa maong krimen kini tungod wala ma-istablisar nga higala kini  ni Que.

 Kini tungod kay gawas nga wala maestablisar nga amigong kauban sa Akrho si Apura, rambol ang nahitabo ug nabunalan ra niini ang biktima.

 Dugang pa niini nga kun ugaling ibasura sa maong huwes ang ilang motion for reconsideration dalhon usab nila kini ngadto sa Court  of Appeals sa ingon mapangitaan usab og hustisya ang iyang kliyente nga nadamay lang sa maong krimen.