5 ka goons sa politiko nasikop

Lima ka mga tawo nga gidudahang mga goons sa usa ka politiko sa lungsod sa Madredijos ang gidakop diha sa checkpoint sa kapolisan niadtong milabay''ng gabii ug nakuhaan og nagkalain-laing kalibre sa armas.

Ang Sub Task Force Bantayan nga gipanguluhan ni Chief Insp. Julian Entoma mibutang og checkpoint diha sa barangay Caungcod ug nasigpatan ang usa ka Alpha Toyota Wagon gikan sa Poblacion, Madridejos nga gisakyan sa lima ka mga tawo.

Ang maong sakyanan gipanag-iya sa usa ka Shirley Regis nga trabahante sa buhatan sa mayor ug padulong unta sa barangay Cangwayan.

Giila ang mga lalaking luwan sa sakyanan mao sila si Rolando Dungan Dacutan 48 anyos, taga Pagsabungan,Mandaue City kinsa maoy nagmaneho sa sakyanan, Cesar Yubaquin 33 anyos, taga Tarong,Madridejos, Wilfredo Bacus Bacalso hingkod ang panuigon taga Cubacob, Mandaue City, Romeo Diola Santillan 40 anyos ug Allan Doble Mancio 32 anyos pulos molupyo sa Malbago, Madridejos.

Dihang gisusi sa kapolisan ang dala sa mga lalaki diha sa sakyanan nakita nga nagdala sila og mga armas.

Si Madredijos Mayor, Letty Mancio sa pakighinabi sa Banat News miangkon nga iyang close-in bodyguards sila Bacalso ug Dacutan sanglit ang iyang mga bodyguards nga sakop sa Regional Mobile Group inig ka gabii mamauli man.

Gibutyag usab ni Mancio nga lisensyado ang maong mga armas apan giangkon hinuon niyang wala kini Comelec Gun Ban Exemption ug aksidente lang gyud kining nakarga sa maong sakyanan .

Matud pang Mancio nga nahitabo naman kini bisan wala tuyoa andam silang atubangon ang kasong isang-at unya diha sa iyang kampo ug ingon man ang mga pamahayag sa mga kaatbang niya sa politika.

Dugang pa ni Mancio nga nasayod ng daan ang katawhan sa Sugbu nga delikado ang ilang lugar tungod sa mga armadong tawong nasigpatan diha sa ilang dapit.

Kahinumduman nga si Mancio maoy miawhag sa kapolisan nga ipaubos sa Comelec Control ang ilang dapit tungod sa maong mga armadong mga tawo.

Si P02 Hernan Bulawit desk officer sa Madridejos Police Station dihang nahinabi sa Banat News mitug-an nga ang mga armas nasakmit naglangkob sa usa ka .30 caliber US Carbine Rifle nga may mga magazine og kinse ka mga buhing bala, usa ka .22 caliber magnum Black Widow nga may lima ka buhing bala, usa ka 9mm caliber pistola ug dunay tulo ka magazine, 57 ka buhing bala sa 9mm ug mga bala sa kalibre 45.

Kasong kalapasan sa Comelec Gun Ban ug illegal possession of Fire Arms ang gikatakdang ipasaka batok sa lima.