2 ka K-9 handlers gipamusil

Duha ka K-9 dog handler sa Shangrila Hotel sa Mactan sa dakbayan sa Lapulapu nga usa sa mga venue sa 12th Asean Summit sa Sugbo, ang naangol human mabiktima sa pagpamusil kagahapon sa kaadlawon.

Giila ni PO2 Nelson Muñez sa homicide section ang mga biktima nga mao sila si Jonnel Santos, 30 anyos, ulitawo nga taga San Mateo Rizal ug Peter Lañuza, hingkod ang panuigon ug lumad usab nga taga Metro Manila.

Ang suspetsado giila usab ni PO2 Muñez nga miingon nga mao si Jessie Tayoni, higkod ang panuigon, ulitawo ug lumad usab nga taga Ozamis City kinsa gipangita sa kapolisan sanglit nakasibat kini pahilayo human sa maong hitabo.

Si PO2 Muñez miingon nga samad pinusilan ang naangkon ni Santos ug samad pinusilan usab sa ulo ang naangkon ni Lañuza hinungdan dali kining gikarga sa ambulansiya sa Emergency Rescue Unit Foundation (ERUF) ug gidala sa Mactan Community Doctor Hospital sa Basak sa mao gihapong dakbayan.

Dugang pa niya nga ang duha ka mga biktima ug ang lain pa nilang kauban nga K-9 dog handler nag-inom sa usa ka tindahan sa gawas sa barracks sa Shangrila Hotel nga ilang gipuy-an.

Nagdali kini sa pagpamauli dihang nag-text ang suspetsado nga nakabuhi ang usa sa ilang mga iro apan nasayran sa mga biktima nga gibinuangan lamang sila sa suspetsado sanglit wala may usa sa ilang mga iro.

Dihang miulbo ang mainitong panaglalis ang suspetsado kalit lang mikuha og armas ug namusil dayong sibat pahilayo sa maong dapit.

Si Muñez miingon nga sa crime scene ilang napalgan ang usa ka buhing bala sa kalibre .45, kabhang usab niini.