Fetus nakit-ang su'd sa trash can

Usa ka gibana-banang tulo ngadto sa lima ka bulang fetus ang nakit-ang gilabay sulod sa usa ka trash can sa karaang edipisyo sa Cebu Technical School nga iya na karon sa University of Cebu ning dakbayan niadtong milabay'ng adlaw.

Wala pa matino kung lalaki o babaye ang maong fetus sanglit wala pa kini maporma ug maayo apan gituuhang bag-uhay lang kining gilabay diha sa maong basurahan sulod sa usa ka kasilyas sa pangbabaye.

Sa imbestigasyon sa Homicide Section pinanguluhan ni SPO2 Alex Dacua, kasamtangang naglimpyo sa kasilyas ang janitress nga si Vivian Gudes dihang namatikdan ang maong basurahan nga dunay lama sa dugo.

Tungod sa kakuryoso, gisusi ni Gudes ang sulod niini ug mao nalay iyang nakit-an ang maong fetus, hinungdan nga dali niyang gipahibalo ang labaw sa mga gwardiya nga si Edgar Omac.

Si Omac mao na usab ang mipahibalo sa kapolisan kabahin sa nakit-ang fetus.

Wala pa matino kung kinsa ang inahan sa maong fetus apan gituuhang posibleng tinun-an ra sa maong tunghaan o ba kaha empleyado ra.

Kini maoy labing unang higayon nga dunay fetus nga nakaplagan ning bulana, samtang niadtong milabay'ng buwan upat ka mga fetus usab ang nakit-an gikan sa managlahing mga dapit dinhi sa dakbayan.

Bisan usa ka inahan o responsible sa paglabay sa maong mga fetus walay napasakaan og kaso, ang kapolisan gumikan sa kalisod sa pagsubay sa ilang ginikanan.