CCUVA motambong sa Citom meeting

Motambong ang mga opisyal sa Cebu City United Vendors Association (CCUVA) sa ipahigayon nga Citom board meeting karong buntag.

Ang tumong ug tuyo sa himuong pagtambung sa CCUVA sa Citom board meeting aron hangyuon kini nga dili lang hingpit nga ipatuman ang girekomendar sa Citom nga one-side vending sa 14 ka mga lugar dinhi sa dakbayan nga girekomendar sa Citom ngadto kang Mayor Tomas Osmeña nga ipa-demolish ang mga vendors niining naninda sa sidewalk.

Sila si Maria Pino, tsirman sa CCUVA ug ang Presidente niini nga si Ermita Barangay Captain Felisicimo "Emok" Rupinta maoy motambung sa Citom board meeting.

Gibutyag ni Pino dihang nahinabi sa mga tigbalita nga ila usab nga pahibaw-on ang Citom board kabahin sa nagpadayon nila karun nga pagpanghawan sa sidewalk.

Giklaro ni Pino nga duha ka metros gyud ang lugar nga gihatag nila nga kaagian sa mga tawo ilabi na diha sa sidewalk sa Colon ug gipagamyan og maayo ang mga stalls sa mga sakop niining vendors nga naninda sa maong lugar.

Pagkakaron gitug-an ni Pino nga ang ilang mga sakop sa Osmeña Boulevard padulong sa Kapitolyo mao na usab karon ang ilang gipanghawanan.

Apan bugtong gihangyo nila sa Citom nga dili lang pugson pagpatuman ang one-side vending gumikan kay gawas nga dunay mga sakop nilang vendors ang mawad-an sa ilang kapanginabuhian dili usab kini maayung tan-awon nga ang pikas bahin dunay mga vendors samtang ang atbang walay gitugotang makapaninda.

Gipadayag ni Pino nga gipaabot nalang nila karon si Mayor Tomas Osmeña nga maoy personal nga mosusi sa nahisgutang mga lugar ilabi na sa Colon area aron mao kini modeterminar kun insakto na ba ang lugar nga gihatag sa mga vendors sa sidewalk aron kaagian sa publiko.

Si Osmeña una nang mihatag og laing usa ka semana nga lugway sa mga vendors paglimpyo sa sidewalk ug misaad kining mangunay pagsusi sa dili pa ipatuman sa hingpit ang demolisyon.