Idlas nga pusher sa Cuenco list nasikop

Labing idlas nga gidudahang level one drug pusher nga nalakip sa drug expose' ni Kongresista Antonio Cuenco niadtong tuig 1997 nadakpan ra gyud sa kapolisan sa dakbayan sa Sugbo niadtong Martes sa gabii diha sa usa ka pension house sa dakbayan sa Lapu-Lapu.

Ang nadakpan giilang si Epifras Regis alyas Tatay Pepe, 56, uban sa iyang asawang si Gloria, 57, ug drayber nga si Christopher Omambac. Si Regis dugay nga mibiya dinhi sa Sugbo sukad nga migawas ang iyang warrant of arrest nga giluwatan ni RTC Branch 15 Judge Fortunato de Gracia niadtong Disyembre 20, 2005.

Ang tulo nadakpan human makadawat og impormasyon ang Criminal Investigation and Intelligence Branch ug Vice Control Section sa dakbayan sa Sugbo og impormasyon gikan sa ilang Barangay Intelligence Network kabahin sa presensya ni Regis sa dalan M. J. Cuenco sa Villagonzalo Dos, Tejero ning dakbayan ug padulong kini sa dakbayan sa Lapu-Lapu.

Ang CIIB ug VCS pinangulohan nila ni Supt. Pablo Labra ug Chief Insp. George Ylanan daling migukod sa sakyanan sa magtiayon nga usa ka Honda CRV nga kolor puti nga may plakang GSR-763.

Ang drayber sa duha maoy unang nadakpan diha sa parkingan sa Ace Pension House sa Pajo, dakbayan sa Lapu-Lapu, nakuhaan kini og usa ka medium size nga paketeng may sulod nga gidudahang shabu.

Samtang ang magtiayon nga gidakop diha sa room 310, dunay nakuhang usa ka medium size nga pakete diha sa asawa ni Regis nga si Gloria.Sa pagsusi sa ilang sakyanan nakuha sa dashboard nila ang usa ka pitakang giangkon ni Regis nga iya nga dunay usa ka medium size ug duha ka paketeng pulos dunay sulod nga shabu.

Nakuha usab ang P51,500 nga kwartang giangkon sa magtiayon nga halin sa gidiling drugas.

Matud pang Labra nga labing idlas sa tanang drug personality nga nalista sa 15 ka tawong naa sa drug watchlist sa dakbayan sa Sugbo sanglit sukad masukad wala pa kini madakpi, sagad niining puy-an mao ang mga pension houses.

Si Regis maoy ika-unom nga nadakpan sa maong listahan uban nila ni Christopher Ocarol, Jun Baldesamo, Dolor Fernandez, Samuel Pancho, Roland Abelgas, samtang ang ikapito mao si Terry Abellana kinsa namatay tungod sa sakit.

Matud pa sa tsirman sa komitiba sa drugas sa konseho si Regis usa ka wholesaler sa drugas nga nagbaligya ra og P42,000 nga presyo matag bulto (lima ka gramos) ug direkta ang suplay niini gikan sa Ozamis City.

Si Regis kinsa nagsaulog sa iyang ika-56 nga birthday miangkong nagsugod siya pagsulod sa negosyo sa drugas niadtong tuig 2002 dihang wala nay klarong mabalik ang jai alai diin siya usa ka coordinator sa masiao nga sugal.