Mga isda sa Aloguinsan nangamatay

Gihimakak ni Mayor Cynthia Moreno sa Aloguinsan kagahapon nga dunay mga sakit-sakit sa panit ug nangamatay ang mga isda sa iyahang lungsod tungod sa gipahigayong oil exploration diha sa lugar.

Kahinumduman nga ang grupo sa PAMANA mipasangil nga aduna nay mga mananagat ang nagkasakit sa panit ug adunay mga isda ang nangamatay sa Aloguinsan tungod sa oil exploration diha sa Tañon straight.

Ang maong nga taho gihimakak ni Moreno tungod kay wala kini maabot diha sa iyang buhatan.

Gitataw ni Moreno nga bisan unsa ka gamay sa problema diha sa iyang lungsod moabot gyud kini sa iyang buhatan ug ang maong problema nabasahan lang niya sa pamantalaan.

Ang PAMANA mibutyag nga ang mga nagpahigayon og oil exploration magdala og kable ug kung aduna kini mabatyagan nga lana mobuto kini sa ilawom sa dagat ug ang gikusgon sa buto pil-on og katulo ang usa ka galon nga dinamita apan gihimakak kini ni Moreno.

Si Moreno nagkanayon nga wala siya'y nabating buto diha sa ilang lugar ug wala usab siya makadawat og taho kabahin niini.

Giangkon ni Moreno nga dunay mga payaw nga maguba tungod kay maagian sa nagpahigayon sa oil exploration apan bayaran kini sa kompaniya.

Base sa taho nga ang mga mananagat mireklamo nga P300.00 lang ang ilahang nadawat nga bayad sa matag payaw nga naguba ug ang maong taho gihimakak usab ni Moreno.

Sa milabay'ng semana ang Bureau of Fisheries and Aquatic Resources (BFAR) nagpahigayon og survey sa lugar.

Adunay pito ka kilometro gikan sa baybayon ang gilay-on sa nahimutangan sa gituohang "oil source".