Karsada gikan Tagunol giplanohan

Gumikan sa nasinating problema atol sa pag-ulbo sa sunog diha sa Ubos-Pundok, San Pedro Uno ug San Pedro Dos sa Basak ning dakbayan nabuhi ang dugay nga natanggong nga planong pagbutang og kalsada nga magkonektar sa Tagunol ngadto na sa South Road.

Kagahapon mitug-an si SFO2 Felix Romero sa Banat News nga miabot sa hustong oras ang mga bombero apan diha na malangay sa pagsumpay-sumpay sa hose.

Base sa Geographical Information Satellite Map nga naa sa buhatan ni Basak Kapitan Roberto "Bob" Cobarubias dunay gilay-ong dul-an 200 ka metros gikan sa kalsada sa N. Balcalso ang maong mga sitio.

Gitug-an ni Cobarubias sa Banat News nga 14 ka tuig na ang nakalabay giplanuhan na kaniadto pa ni Konsehal Ruben dela Cerna ug Cobarubias nga butangan og kalsada kilid sa Lorenzo Milling apan miani kini og mga pagsaway ug reklamo sa mga residente kay giingong "ma-displaced" kuno sila.

Niadtong tuig 2000 usa ka balay sa samang sitio ang gitugpahan og kwitis ug diriyot nga mokatap ang sunog kung wala pa matabang sa mga residente, giingong nag-ungot ra diha sa gawas ang mga bombero tungod sa kalayo sa kalsada.

Pangusgan karon sa konseho sa barangay ang pagpatukod og kalsada nga may gitas-ong 547 ka metros nga magkonektar sa Tagunol ngadto na sa South Road, sa pagkakaron bugtong ang dalan Cabreros ug Bontures maoy mga dalan nga masudlan sa maong dapit apan walay dalan diha sa gikahitaboan.

Sa sunog kagahapon nga miugdaw og gibana-banang 320 ka panimalay, dunay kaslunong sila si Cerlita "Cerly" Castolo ug Maximino Albeso nidangop kang Konsehal David Tumulak aron magpatabang nga madayon ang ilang kasal karong Mayo 25 diha sa Holy Cross Parish.

Giingong naapil og kasunog ang tibuok suoton sa entourage sa ilang kasal ug ang kwartang gamitonon.

Kagahapon usa ka kalibre 45 nga pistolang gubaon ang nasakmit ni Tumulak gikan sa usa ka molupyo nga nakapudyot niini diha sa nasunugan.