Trese anyos 'lugos sa iyang bayaw

Gilugos ang usa ka 13 anyos sa iyang bayaw niadtong Biyernes sa Carmen, dakbayan sa Toledo.

Ang biktima nga si Marie (tinuod pangalan gipugngan), molupyo sa Luray II, Toledo City ang gituuhang gilugos sa iyang bayaw nga si Tomas (apelyido gipugngan), 32, minyo, molupyo sa Sitio Bolahan, Toledo.

Matud sa report, si Marie mipuyo sa panimalay sa magtiayon mga usa na ka bulan aron matabangan kini sila sa mga buluhaton sa balay.

Nianang pagkahitabo ang asawa ni Tomas nga si Nilda(tinuod ngan gipugngan) dunay importanteng gilakaw maong ang biktima ug ang suspek lang ang nahibilin sa balay.

Si Tomas nagpakaaron ingnong misusi sa ngipon ni Marie apan dihang naduol na ang biktima kalit niya kining gibira og paubos sa salug ug diha gilugos uban sa hulgang patyon kun di motuman ug kun mosumbong.

Ang inahan sa biktima ug ang biktima miadto sa kapulisan ug mireport sa nahitabo diin si Dr. Hermes Labrador mihiling sa biktima ug migawas nga positibo gyud nga nahilabtan kini.

Ang kapulisan sa Toledo nga gipanguluhan ni PSI. Eliakim Awit kauban ang duha ka taga DSWD miresponde ug giaresto ang suspetsado.

Ang suspetsado kasamtangang nahimutang sa Toledo City Detention and Rehab Center ug pasakaan ug kaso karong Lunes. - Uban sa taho ni Brenda D. Batuto