Mga mananagat sa Tangke miduol, hangyo ni Tomas

Miapelar ngadto sa buhatan ni Mayor Tomas Osmeña ang pundok sa mga mananagat nga nagbase sa Tangke, Talisay aron katugutan kini nga makapanagat sa kadagatan nga sakop sa dakbayan sa Sugbo.

Ang kahugpungan sa Panaghiusa sa mga Gagmay'ng Mananagat sa Tanke (PAGAMTA) pinangulohan sa ilang presidente nga si Saturnino Bacaltos giubanan gyud ni kanhi Talisay City Mayor Dehlia Tiu aron maoy mopaabot sa maong hangyo ngadto sa mayor.

Subay sa petisyon nga gipadangat sa Pagamta ngadto kang Osmeña gipasalig niini nga mo-kooperar sa mga programa nga himuon sa siyudad sa Sugbo kun katugotan lang sila nga makapanagat aron pagtubag sa ilang adlaw adlaw nga panginahanglan.

Ilang gipadayag nga hinay hinay na nga nagkahurot ang mga isda sa Talisay gumikan sa padayung pagdaghan sa mga mananagat sa ilang lugar hinungdan nga nakahukom sila nga moabot sa pagpanagat sa kasikbit nga dakbayan.

Apan gihatagan og kondisyon ni Osmeña ang maong mga mananagat nga gikinahanglan nga mosunod kini sa mga lagda nga ipatuman ug ipamonitor ang ilang mga kalihukan sa Cebu City Bantay Dagat Commission, pinanguluhan ni Elpidio dela Victoria Jr.

Gituyo kini aron walay mga pagpangabuso nga mahitabu sama sa illegal nga paagi sa panagat.