Tomas giduaw sa taga San Carlos

Wala gihapon matagbaw si Mayor Tomas Osmeña bisan pa man sa gihimong mga pagpasabot sa mga nagpasiugda sa milabayng survey kabahin sa mga kalambu-an ug nahimo sa mga lokal nga opisyal sa trese ka mga siyudad dinhi sa nasud.

Kagahapon sa buntag ang counterpart sa Asian Institute Management (AIM) dinhi sa Sugbo nga mao ang University of San Carlos maoy mibisita sa buhatan ni Osmena aron ipasabot ang nakab-ot nilang resulta sa survey.

Kini human gi-kuwestiyon sa mayor ang resulta sa maong survey nga matud niya wala sila hatagi og kumpletong impormasyon kun unsay gibasehan niini ug kun nganong nangiwit ang syudad sa Sugbo ilabina sa natad sa pagpatuman og mga proyektong inprastraktura.

Apan ang dili gyud madawat sa mayor mao ang resulta sa survey diin gihulagway ang iyang adlministrasyon nga dili transparent ang iyang mga transaksyon ngadto sa publiko.

Hinuon giangkon sa mayor wala kaayo siya mobati og kahimangod human sa maong mga gihimong pagpasabot sa nagpasiugda sa maong survey bisan pa man og wala kaayu siya matagbaw niini.

Kini tungod kay gusto sab niya nga mahibaw-an ang kasamtangan karun nga nahimutangan ingon man kalampusan sa dakbayan ubos niining iya karong pangagamhanan.