Tabal naabot ang Olympic qualifying time sa marathon
MANILA, Philippines - Sa tinakbuhan niyang Scotiabank Ottawa Marathon sa Canada noong Linggo ay nakuha ni Mary Joy Tabal ang cut-off time ng marathon para sa 2016 Olympic Games.
Nagposte ang 25-anyos na reigning running queen mula sa Guba, Cebu ng bilis na dalawang oras, 43 minuto at 31 segundo para tumapos bilang pang-walo sa nasabing 42-kilometer event.
Ang naturang tiyempo ng silver me-dalist ng 28th Southeast Asian Games ay mas mabilis sa Entry Standard na 2:45:00 para sa women’s marathon.
Ngunit si Tabal ay umalis sa national team ng Philippine Amateur Track and Field Association noong 2015 matapos ang SEA Games dahil sa hindi pagkakaunawaan sa pagkakaroon niya ng sponsor.
“If she wants to go to the Olympics, she has to be a part of the national team. She has to request for reinstatement and I’ll endorse it,” sabi ni PATAFA chief Philip Ella Juico.
Kung ibabalik si Tabal ng PATAFA sa national team ay maaari niyang makasama para sa 2016 Olympics sa Rio de Janeiro, Brazil sa Agosto sina Fil-Am trackstar Eric Cray, long jump specialist Marestella Torres.
Nakatakdang bumalik sa bansa si Tabal, dating sprint star ng Southwestern University, sa Hunyo 5.
Bukod kina Cray at Torres, ang iba pang nakakuha ng tiket para sa Rio Olympics ay sina taekwondo jin Kirstie Elaine Alora, table tennis entry Ian La-riba, boxers Rogen Ladon at Charly Sua-rez at lady weightlifter Hidilyn Diaz.
May ilan pang Filipino athletes na determinadong makakuha ng Olympic slot sa boxing, golf, swimming, weightlifting at basketball. Ang final deadline para sa pagsusumite ng entries by name ay sa July 18. (RCadayona)
- Latest
