Lee, Chan hindi pa makakalaro sa pagsisimula ng Commissioner’s Cup
MANILA, Philippines - Sa unang dalawang linggo ng 2016 PBA Commissioner’s Cup ay maglalaro ang Rain or Shine na wala ang ilan nilang key players.
Kasalukuyan pang nagpapagaling si combo guard Paul Lee ng kanyang knee injury, habang sa Marso pa makakapaglaro si shooter Jeff Chan dahil sa kanyang elbow injury.
Inaasahan namang makakabalik sa kanilang mga porma sina 6-foot-8 center Raymond Almazan at guard Jericho Cruz at ang pagbabalik ni import Wayne Chism ang makakatulong para sa Elasto Painters.
“Chism is okay. He arrived early and he came in game shape,” sabi ni coach Yeng Guiao kay Chism na hinirang na PBA Best Import sa nakaraang Commissioner’s Cup na pinagharian ng Talk ‘N Text. “He didn’t gain weight. He’s really like his old self.”
Ito ang ikalawang sunod na pagkakataon na maglalaro si Chism para sa Rain or Shine.
Magsisimula ang 2016 PBA Commissioner’s Cup bukas sa Smart Araneta Coliseum tampok ang paghaharap ng Tropang Texters at Blackwater Elite sa alas-4:15 ng hapon at ang pagtutuos ng Star Hotshots at Meralco Bolts sa alas-7 ng gabi.
Si Chan ang naging leading scorer ng Elasto Painters sa nakaraang Philippine Cup sa kanyang averages na 13.16 points a game bukod pa sa 3.2 rebounds at 1.8 assists.
Dahil naman sa knee injury ay hindi nakalaro si Lee sa elimination round at napanood lamang sa semifinals kung saan sila sinibak ng San Miguel.
- Latest
