Casino-hotel, nabulabog ng usok
MANILA, Philippines - Nagdulot ng tensiyon ang usok na nakita sa isa sa mga palapag ng isang casino-hotel matapos palabasin ang mga empleyado at guest nito, kahapon ng umaga sa Parañaque City.
Ayon sa pamunuan ng Okada Manila, na matatagpuan sa Parañaque City, pasado alas-10:00 ng umaga nang ma-detect na umuusok ang isa sa mga palapag nito.
Kung kaya’y kaagad na sinunod nila ang emergency response procedure. Dahilan upang agad na palabasin ang mga kawani dito at mga guest, na nagdulot ng bahagyang tensiyon.
Nabatid naman kay Parañaque City fire marshal Supt. Renato Capuz, alas-10:55 ng umaga nang rumesponde ang isa sa kanilang fire truck sa naturang casino-hotel.
Pagkaraan ay balik na sa normal ang operasyon nito nang pabalikin ang mga pinalabas na mga kawani at mga guest ng naturang casino-hotel.
Sa inisyal na imbestigasyon, nanggaling aniya ang usok sa construction site, ngunit inaalam pa ang sanhi nito.
- Latest
