Butler mibida sa bulls

CEBU, Philippines - Si Jimmy Butler mipabuto og 33 puntos aron pahayagan ang tsansa sa Chicago Bulls nga makasud sa playoffs bugti sa 106-104 nga daog batok sa Atlanta Hawks sa NBA kagahapong adlawa didto sa United Center sa Chicago, Illinois.

Taliwala sa pagkamabayanihon ni Butler, ang Bulls miinat sa ilang baraha ngadto sa 37-39 aron sa pagtabla uban sa Miami Heat ug Indiana Pacers alang sa ikapitong luna sa playoff nga gitagana sa Eastern Conference.

"Nobody picked us to be in the playoffs, nobody picked us to win," matud pa ni Butler. "I'm just out there playing basketball. I want to win – I think everybody knows that."

Miabag ni Butler si Rajon Rondo, nga dunay 25 puntos ug 11 ka rebounds ingon man silang Denzel Valentine ug Paul Zipser nga nagkumboya og 23 puntos.

Didto sa West, ang No.5 seed LA Clippers milampaso sa silingan niining Lakers, 115-104, ubos sa pagpangu ni Blake Griffin nga mipabuhagay og 36 puntos. Mao kadto ang ika-800 nga daog ni Doc Rivers isip coach, samtang ang Clippers nagtangag na karon og 47-31 record.

Wala hinoon gibati og tumang kalipay si Griffin bisan og sila milampos gumikan kay iyang nakita nga duna pay daghan nga haw-ang sa ilang dinuwaan, apil na niini ang kakulang nila og 'killer instinct' sa ilang mga kontra kay sagad sila mokolapso sa higayon nga makalabaw og dako.

"It's still something that needs to be worked out," dason pa ni Griffin agig pag-awhag sa iyang mga kauban nga bairon og maayo ang ilang abilidad alang sa nagsingabot nga playoffs. "You can't win games in the playoffs playing inconsistently, so it is concerning."

Samtang segurado nang sud sa sunod nga hugna ang Clippers, ang Lakers hagbay rang natagak ug karon misukarap ngadto sa ika-55 nila ka pilde nga giatbangan lamang og 21 ka daog. (BANAT NEWS)