Lingawlingaw sa Semana Santa

Alang kanatong mga Katoliko, ilabi na niadtong dili kaayo mosimba, holy kaayo ang Semana Santa panahon sa pagpuasa, pagpamalandong, paghinulsol, pagpenetensiya, ug pagduyog sa pagpasakit sa atong Manunubos pinaagi sa pagtambong sa mga kalihukan sa Simbahan, ilabi na sa Huwebes ug Biyernes Santo.

Apan alang sa uban, ang Semana Santa, ordinaryo ra nga semana, sama sa ubang semana sa ilang kinabuhi. Gani, alang sa pipila kanato, kadtong daghan kaayo’g kuwarta, ang Semana Santa, bakasyon grande alang kanila. Ila lang pud ni. Walay makabuot kanila, bisan ang Ginoo mismo dili makapugos kanila unsaon pag-observe ang Semana Santa.

Sa Santa Fe, isla sa Bantayan, pananglitan, usa ka grupo naglaraw pagpasiugda’g dakong kalingawan nga ginganlan og Music Festival Food & Fashion Abril 13 – 15. Unsa man ning mga adlawa? Maunday Thursday, Good Friday, ug Black Saturday gyud. Mao ni ang ilang paagi pag-observe sa Semana Santa.

Ambot ngano nga dili man mahimo sa liwas na lang sa mahal nga adlaw ang ilang paglingawlingaw? I hope dili kini madayon.

* * *

Sa Baguio City, gi-require na ang pagtaud og CCTV, kon close-circuit television sa mga balay patigayon una sila makalukat og business permit. Kinahanglan magpa-install og TV camera, video recorder ug monitor, ug i-operate 24 oras matag adlaw. Multa sa dili motuman P5,000 (gamay ra), o usa ka tuig nga bilanggo, or both.

Gipatuman usab kini dinhi sa atong dakbayan. Lagmit ang ubang dagkong dakbayan sa nasud misagop na usab niining maong paagi pagsumpo sa kriminalidad. Covered ning maong ordinansa sa Baguio City, ang mga restaurant, hospital, mga tunghaan, shopping centers, sinehan, groceries, balay-kalingawan, mga bangko, gasoline stations, pawnshops, money changers, mga bodega, ug uban pa.

* * *

Sa Tanauan City, Batangas, usa ka 10-anyos nga estudyante namatay human kini sumbaga sa iyang schoolmate. Ang biktima usa ka grade 5, samtang ang suspetsado nagpanuigon og 11-anyos.

Naunsa na man ta niini, uy? Unya, makadungog kita nga usa ka bata nga gikasab-an lang sa inahan, naghikog. Ang ubang bata, na-depressed pag-ayo, wa na makaagwanta sa problema, naghikog. Duna say mga batan-on, naghikog pud, tungod lang kay gibuwagan sa uyab.

Bida!

* * *

Dili ma-impeach si Presidente Digong Duterte. Mao kini ang pamahayag o mga komentaryo sa mga tigpaniid sa politika. Gawas sa popularity ni Duterte, ang reality diha sa Lower House nga anha manukad ang impeachment proceedings, dili kini maka-first base, kun duna may mangahas pag-file ning maong kaso.

Duna ba?