Kapin sa 20 ka gambling machine nasakmit

CEBU, Philippines — Kapin sa 20 ka ilegal nga makinang pasugalan ang nasakmit sa City Intelligence Branch (CIB) atol sa ilang gipahigayon nga Simultaneous Intensified Police Operation batok sa mga ilegal nga kalihukan niadtong Huwebes sa gabii.

Ang operasyon gipangulohan ni Senior Inspector Narrolf Tan, deputy chief sa CIB ug ubos sa supervision ni Police Superintendent Joel Doria.

Ang kapolisan nakasakmit og 12 ka video karera ug duha ka moli-moli diha sa Sitio Continental ug Sitio Buli sa Barangay Duljo Fatima, dakbayan sa Sugbo.

Giingong ang maong mga makinang pasugalan gi-abandonar kini diha sa nahisgutang lugar hinungdan nga ang kapolisan walay nasikop nga caretaker niini.

Laing 11 ka moli-moli ug upat ka video karera ang nasakmit usab sa CIB diha sa dalan A. Lopez, Barangay  Calamba, dakbayan sa Sugbo. Giingong ang kapolisan nakadawat og report gikan sa usa ka concerned citizen kabahin sa giingong paghitak sa mga makinang pasugalan diha sa maong lugar. (BANAT NEWS)