Pagkalukapa ug Pagbarog ni Osheila

CEBU, Philippines — Siyam ka tuig siyang naningkamot aron maangkon ang iyang diploma sa kolehiyo, human siya gisalikway sa iyang mga ginikanan. Kini human usab siya napamabdosan sa iyang classmate atol sa unang ang-ang niya sa kolehiyo. Busa, giingnan siya sa iyang amahan nga kinahanglan nga dili mupauli sa ilaha didto sa Misamis, kon wala siya’y bitbit nga college diploma.

Kini ang kasaysayan sa kinabuhi ni Osheila Panal Boag, 45 anyos, ug tag-iya sa Hotrock spa/salon. Labihan ka tunukon ang dalan nga gisubay ni Osheila, una pa niya hingpit nga naabot ang iyang nahimutangan karon.

“Si Daddy is a disciplinarian. Dili me spoiled. Kung gusto mi mokaon, ipakaon tanan pero dili me hatagan og kwarta,” butyag pa ni Osheila, kinsa niklaro ngadto sa Banat News Tingusbawan nga dili sila dato, apan dili sab sila kabos.

Utokan si Osheila. Salutatorian siya sa iyang pagtapos sa elementarya. Nagdako siya nga nasilsil sa iyang alimpatakan ang baruganan sa iyang amahan: Kon gusto ka nga maka kuwarta, kinahanglan nga maghago ka gayud niini.

Sa pagtaak na niya og high school nakasinati siya og pagbugalbugal gikan sa iyang mga classmates. Kini kay matud pa niya, gikan siya sa usa ka public school nga nibalhin ngadto sa tunghaan nga pribado.  “Ang tiil sa akong kauban ipatong sa luyo sa akong bangko ug mahugaw akoang uniform. Daug-daugon ka kay public man lagi ka gikan,” hinumdom pa niya.

Labihan ka higpit usab matud pa sa iyang inahan, diin bisan igo lamang siyang mugunit sa gate, pasanginlan na siya nga nangita og lalaki. Kon aduna usab matud pay mututok niya nga lalaki, ingnon kini sa iyang inahan nga dili magpatugatuga kay wala kini ikabuhi sa iyang anak dalaga.

Sa kolehiyo, gitugtan siya sa iyang amahan nga dinhi sa Sugbo mutungha, apan gipaubanan siya sa iyang igsuong lalaki. Nikuha siya og B.S. Computer Science sa usa ka unibersidad. Unya nahagbong ang iyang igsuong lalaki sa subjects niini, hinungdan nga gipabalik kini sa Misamis, samtang si Osheila, gipatipon sa iyang iyaan.

Ug napamabdosan si Osheila sa iyang classmate, sa linghod pa nga pangidaron. “Naibog ko niya kay I’m very close to my dad and my brother. Niya nag-long ko nila ug siya raman ang parehas og attitude sa akong papa ug kuya adto,” butyag pa niya.

Nipadayon siya og tungha hangtud nga nanganak siya paglabay sa pito ka bulan. ‘Special child” ang iyang anak, nga matud pa, naggumikan kay magul-anon siya atol sa iyang pagsabak sanglit nagkonsumisyon siya sa amahan sa iyang anak.

Nasayran nga gililong niya sa iyang pamilya ang iyang pagsabak. Diha na siya nitug-an human niya gihimugso ang iyang gisabak. Gipapauli siya sa iyang mga ginikanan didto sa Mizamis aron adto na patiwason og eskuyla. Apan nilayas si Osheila, ug nibalik dinhi sa Sugbo.

“Niana si papa-- sige, kay gahi man gyud kag ulo, ayaw og uli dinhi kung wala kay dala nga diploma,” hinumdom pa niya.

Busa naningkamot siya, aron pamatud-an sa iyang amahan nga makabarog siya sa iyang kaugalingong pagkinabuhi. “Dinha nagsugod akong trials, I worked as karaoke singer, promodiser nga P100 ang sweldo, ug manglabada,” tug-an pa niya.

Nakatrabaho usab siya isip cashier sa usa ka karaoke bar, diin dinha nakaplagan ang iyang talent sa pag-awit. Nakakuwarta siya adtong tungora, sanglit kon wala’y singer, siya maoy ihulip ug makadawat siya’g tip gikan sa ilang mga customer.

Ingon niini ang paningkamot ni Osheila, samtang nagtipon sila og puyo sa amahan sa iyang anak, ug diin nipadayon sab siya og tungha. Kon mutrabaho o mu-eskuyla siya, ang lola sa bata maoy muatiman sa iyang anak. Nitipon sila og puyo sa pamilya sa amahan sa iyang anak.

“I never disturbed my parents at all. I never asked any single cent from them,” mapasigarbuhon niyang asoy.

Nagkonsumisyon matud pa siya sa kiliran sa iyang uyab, hinungdan nga nakigbuwag siya niini human sa siyam ka tuig nga panag-ipon. Sa mao usab nga panahon, nakatapos gayud si Osheila og kolehiyo. Nipauli siya sa ilaha bitbit ang iyang diploma.

Unya, nilupad siya sa Singapore aron mutrabaho isip waitress, samtang gibilin niya ang iyang anak sa pamilya sa iyang kanhi uyab ug kapuyo. Maayo ang relasyon niya sa amahan sa iyang anak bisan pa man sa ilang panagbuwag. “Siya ang nakapalig-on nako maong wala gyud ko nagdumot niya.”

Didto sa Singapore, subling nahigugma si Osheila, dihang nahibalag niya ang usa ka British national, nga iyang naminyuan. Apan nagbuwag sila human sa hamubo da nga panahon. Unya, nahibalag niya ang iyang bana karon, ang 57-anyos nga Scottish ship engineer nga si Stephen Boag, nga iyang nakaila pinaagi sa usa ka blind date.

Sa sinugdanan, wala siya’y interes kang Stephen, busa wala gyud siya nangandam sa ilang panagkita. Wala siya’y pagpaka aron ingnon. Apan daw, badlis sa kapalaran nga silang duha gayud ang magkadayon. Pilay dagan sa panahon, nibalik sila ni Stpehen dinhi sa Sugbo ug nagpakasal.

Negosyo

Unang negosyo ni Osheila mao ang spa isip franchisee sulod sa duha ka tuig. Unya, nagbukas siya og iyang kaugalingong spa business nga mao ang Hotrocks Spa/Salon. Maayo ang dagan niini, hinungdan nga niadtong 2010 nagbukas siya og gym. Apan gumikan sa nagsunod-sunod nga kalamidad sama sa bagyong Yolanda ug linog, diin hilabihan nga naapektuhan ang iyang establisemento. Perteng pagkagubaa niini.

“Nalugi mi’g P12 million,” butyag pa niya, kinsa nipaambit sab nga naproblema sab siya sa uban niyang mga empleyado niadtong tungora.

Zumba

Gumikan sa nahitabo, nagkat-on siya og zumba. Nitanyag dayon siya og zumba classes isip pamaagi pagsalbar sa kahugmakon niya nga negosyo. Dinhi inanay nga nilambo pag-usab ang iyang negosyo. “I fall and I stand on my own. Pasalamat ko sa akong manager nga si Chris ug Zumba duo nga si Zin Eden ug sa akong bana nga wala gyud nibiya nako.”

Unya nagpahigayon na usab sila og zumba sessions sa nagkadaiyang malls. “Zumba helps me a lot in my life. It helps me katong nagkaproblema ko’g financial. Kini man ang stress reliever, ma-relax ka unya you earn money pa.”

Taliwala sa kalamposan niya karon, ang pag-ampo ra gyud ang giisip niyang sekreto nganong nasagubang niya ang mga pagsuway nga nisuway pagbabag sa iyang agianan.

“Prayers gyud. Wala lang gyud ko ni-surrender. Ang akong prinsipyo man gud, dili mohatag ang Ginoo og problema nga dili nato masulbad. Makaya gyud na nimo,” padayag pa niya.

Busa tambag niya ngadto sa mga tawo nga buot sab molampos sama niya mao:

“Believe me, mangandoy lang gyud ka, maminaw gyud ang Ginoo nimo. Nilampos ko tungod sa akong naagian sa una nga nakapakusgan nako. Keep on trying. Pray lang.”